NLW MS. Peniarth 45 – page 285
Brut y Brenhinoedd
285
Ac ny maỽr dygrynoes udunt gan uar+
waỽl tymhestyl newyn a daroed idi llad
a distryỽ syberỽ genedyl y bryttanneit hyt
na ellynt gỽrthlad gormes y saesson y ỽrth+
unt ac o hynny allan ny elwit hỽy yn bryt+
tanneit namyn yn kymry. Ac y gỽnaeth
y saesson yn gall Cadỽ duundab y·rydunt
e|hun a diwyllaỽ y tired. Ac adeilat y kes+
tyll ar dinassoed. Ac y·uelly y byrasson ar+
glỽydiaeth y bryttaneit y arnunt. Ac
hỽy yn medu holl loygyr y dan Edelstan
yn tywyssaỽc arnadunt y gỽr kyntaf
a wisgỽys Coron y teyrnas o|r saesson.
Ac o hynny allan y colles priaỽt genedyl
yr ynys eu henỽ ac eu dylyet. Ac ny|s caỽs+
sant o hynny allan. Namyn diodef yn
wastat keithiwet saesson arnadunt.
y tywyssogyon a|uu ar kymry gỽedy
hynny pob eilwers a orchymynneis i
y caradaỽc o lan garban uyg kyt oessỽr
ac idaỽ y hedeweis defnyd y yscriuenu
y llyuyr o hynny allan. Brenhined y sa+
esson y rei a|doethant ol yn ol a orchymyn+
neis y wilym o walmesbyr a henri hon+
tendeson. A thewi a rei kymry Canyt
| « p 284 | p 286 » |