BL Additional MS. 19,709 – page 73v
Brut y Brenhinoedd
73v
a|normandi a cenoman a|r angiỽ. a|pheitav petwar
vgein mil o varchogyon. ac y gan y deudec gogy+
furd y doethant y·gyt a|gereint deudec|kant march+
aỽc a mil o varchogẏon aruaỽc. a|sef oed eiryf
hynny oỻ y·gyt. deucant marchaỽc a|their mil
a|phetwar ugein|mil. a|chan mil. heb eu pedyd
yr hyn nyt oed haỽd eu gossot yn riff.
A gvedy gỽelet o arthur pavb yn baraỽt yn|y
reit a|e wassanaeth. erchi a|oruc y baỽb brys+
syav y wlat ac ym·baratoi. ac yn erbyn kalan
aỽst bot eu kynadyl oỻ ygyt ym|porth barber+
floi ar tir ỻydaỽ ỽrth gyrchu bỽrgỽyn odyno
yn erbyn gvyr freinc. ac y·gyt a hynny. mene+
gi a|oruc arthur vrth genadeu gvyr rufein na
thalei ef teyrn·get vdunt vy o ynys. prydein. ac nyt
yr gỽneuthur iaỽn vdunt o|r a holynt yd oed ef
yn kyrchu rufein. namyn yr kymeỻ teyrn·get
idaỽ ef o|rufein Megys y barnassei e|hun y dylyu.
ac ar hẏnnẏ yd aethant y brenhined a|r gvyrda ̷ ̷
pavb y ymbaratoi heb vn annot erbyn yr am+
ser teruynedic a ossodyssit vdunt ~
A gỽedy adnabot o les amheraỽdyr yr atteb
a gaỽssei y gan arthur drỽy gygor sened
rufein eff a eỻygvys kenadeu y wyssyav bren+
hined y dvyfrein. ac y erchi vdunt dyfot ac
eu ỻuoed gantunt y·gyt ac ef wrth weres+
kyn ynys. prydein. ac yn gyflym yd ym·gynuỻas+
| « p 73r | p 74r » |