Breudwd Welsh Prose 1300-1425
Cymraeg

Cardiff MS. 3.242 (Hafod 16) – page 27

Meddyginiaethau

27

tori a dot arnaỽ. Y vỽrỽ esgyrn tỽnn aỻan. yf sud y
violet a|thi a|e|tefly y maes o|r bydant myỽn aelaỽt ar
dy gorff. Rac cornỽydon; kymer velyn·wyeu a|halen
a chymysc ygyt a|gỽna blastyr o·honaỽ a dot ef ar|lin
ac odyna dot arnaỽ a iach vyd. Rac dauadenneu. kymer
egyrmỽyn a briỽ a thempra gyt ac eysel a|chlỽm ỽrth
y dauadenneu ac ỽynt a|ant ymeith. Y iachau gỽewyr
a|gỽaet yssic; kymer. gic hỽch teỽ hallt o hen.|ỻỽdyn. a thaỽd ef
a|gat y sefyỻ yny el yr halen y|r gỽaelaỽt. a chymer y gym+
eint araỻ o gỽyr newyd. a berỽ ygyt. a bỽrỽ bỽdyr o cens
gyt ac ef. a chymer. mastic a briỽ yn van a|dot gyt ac ef
ac ymot ỽynt yn ffest yn* vont yn|deỽ megys mel a
chadỽ gennyt hỽnnỽ. a phan reit dot ỽrthaỽ ar glỽt bre+
thyn neu ar ledyr. ac ef a|dynn y|maes y dolur a|r gỽewyr.
ac ir ef dỽyweith beunyd. a hynny a|e gỽna yn iach. Rac
hỽyd myỽn breich dyn neu myỽn ỻe araỻ ar|y gorff
o|r|tebygy idaỽ gornỽydaỽ. kymer linhat a|briỽ a gỽlych
ychydic a dot. gyt ac ef wer deueit myỽn padeỻ ar|y tan
yny vo yn vrỽt a dot myỽn clỽt brethyn ar|y dolur. ac
ef a|dynn y dolur ac a|e hiachaa. Llyma ual y gỽneir eli
da rac bratheu a chlỽyfeu; kymryt a·vans. bugyl. pigyl;
cengyl. aych. ỻysseu robert. verueyn. ỻysseu gỽaỻter
blodeu yr egroes cochyon. a morteru pob ỻyssewyn e|hu+
nan. a|chymryt o sud pob un gymeint a|e gilyd a|e dodi
myỽn padeỻ. a chanys yr holihock yssyd gyn vrasset
ac na cheffir haeach o sud ohonaỽ. ac am hynny kymryt
y|deil ygyt ac ỽynt a dodi kwyr newyd. a gỽer deueit. a|mel.