BL Harley MS. 958 – page 27r
Llyfr Blegywryd
27r
stlaỽ ac ef am ẏ gam·vraỽt. namẏn o|r
dẏchaỽn ef dangos ẏna neu ẏn oet pẏm+
thec niwarnaỽt trỽẏ lẏfreu kẏfreith ẏn
erbẏn ẏ braỽdỽr braỽt teilẏghach ẏn ẏs+
criuenedic. ẏ teilẏgaf a seif idaỽ. Ac braỽ+
dỽr a|gẏỻ camlỽrỽ. Tri dẏn nẏ aỻant
ẏmỽẏstlaỽ ẏn erbẏn braỽt trỽẏ gẏfre+
ith vn ẏỽ brenhin. ỻe nẏ aỻo herwẏd
kẏfreith seuẏỻ mẏỽn dadẏl ger bron ẏ
braỽdỽr ẏ holi neu ẏ atteb trỽẏ vreint
anẏanaỽl neu trỽẏ vreint ẏ tir mal bre+
ẏr neu araỻ. Eil ẏỽ dẏn eglỽẏssic rỽẏ+
medic ẏn urdeu kẏssegredic. Trẏdẏd ẏỽ
dẏn eglỽẏssic rỽẏ·medic rỽẏmedic* ẏ|gre+
uẏd. kanẏ dichaỽn neb herwẏd kẏfreith
rodi gỽẏstil ẏn erbẏn braỽt onẏt dan peri+
gẏl gwerth ẏ tauot. Ac nẏt oes werth gos+
sodedic ẏg|kẏfreith hẏwel ar aelaỽt a gwa+
et a sarhaet dẏn eglỽẏssic. Ac ỽrth hẏn+
nẏ nẏ eiỻ neb ohonunt ỽẏ rodi gỽẏstẏl
ẏn erbẏn braỽt na chẏt a|braỽt. Hoỻ ar+
gẏwed segẏrỻẏt a|wnelher ẏ|r eglỽyss+
wẏr a dẏlẏir ẏ emendanhau* udunt ẏn|ẏ
sened herwẏd kẏfreith eglỽẏssic. Tri
pheth a dẏlẏ pob braỽdỽr ẏ|warandaỽ
ẏ gan ẏ kẏnhenwẏr kẏn barnu neb o·ho+
| « p 26v | p 27v » |