NLW MS. Llanstephan 27 (The Red Book of Talgarth) – page 135r
Buched Mair Fadlen
135r
laetheu. A gỽedy y canueu hynny y dygei yr engylyon hi
hyt yr vn ỻe drachefyn. ac o|r ryỽ ym·borth hỽnnỽ yd|ym+
borthes hi yn|y diffeith yn hynny o amser. Ac offeiryat gỽr
buchedaỽl heuyt a|oed yn penytyaỽ yn|y didryf. ual ar deu+
deng miỻtir o|r|ỻe yd oed meir uadlen. A dydgỽeith yr ago+
res yr arglỽyd duỽ ỻygeit yr offeirat hỽnnỽ yny weles
ef ual y|deuei yr engylyon att veir uadlen. a pha|wed y dyr+
chefit hi yn|yr awyr. a pha|delỽ drỽy yspeit uechan yd ym+
choelynt a hi drachefyn drỽy volyanneu. A thrannoeth
dan wediaỽ duỽ y doeth yr offeirat parth a|r ỻe yd oed y
wynuydedic ueir uadlen yndaỽ. A phan yttoed ual ar ergit
maen y ỽrth y|ỻe. crynu a|oruc y esgeired y·danaỽ hyt
na aỻei vynet yn nes no hynny y|r|ỻe. a phan ymchoelei
drachevyn y gaỻei gerdet yn dioual. a phan geissei vynet
y|r ỻe yd oed y santes y deuei y clefyt idaỽ yr eilweith. ac y+
na y deaỻaỽd gỽas duỽ bot yno rinwed nefaỽl y ỻe ny
aỻei anyanaỽl dyn dynessau attaỽ. Ac yna galỽ o|r offeirat
enỽ duỽ o hyt y lef. Os dyn neu greadur araỻ heb ef yssyd
yn|yr ogof. mi a|th dynghedaf o bleit y tat a|r mab a|r yspryt
glan yny wrthepych vi. a menegi ym y wirioned. a hynny
teirgỽeith y dywaỽt. Ac yna y gỽrthebaỽd meir uadlen.
Nessaf a|vo nes* heb hi. a|r hynn yd ỽyt yn|y damunaỽ ti a
geffy gỽbyl wirioned am·danaỽ. A gỽedy dy·nessau o·honaỽ
yn ofynaỽc. y dywaỽt hi ỽrthaỽ. Ti a|glyweist yn|yr euengyl
o veir honnedickaf bechadures o|e dangreuoed* a olches tra+
et yr arglỽyd. ac a|e gỽaỻt a|e sychaỽd. ac a haedaỽd kaffel
madeueint o|e phechodeu. Kiglef heb ef. Mi yỽ honno heb
hi.
| « p 134v | p 135v » |