NLW MS. Llanstephan 27 (The Red Book of Talgarth) – page 60v
Ystoria Adrian ac Ipotis
60v
trysteu yn|yr awyr. ac yn gyflaỽnet o|eneidyeu ac y gaỻont vot.
a|than gỽyỻt yn|ỻosgi a|gyuarffo ac ef. Kynhebic yỽ chỽant
bydaỽl y olỽyn benn. Gỽr yn|y Jeuengtit yn enniỻ campeu
a chlot. ac ymrodi oỻ y gynghoruynt a|chwant kenuigen.
ac etto am|hanner y oes na pheidyei yna. namyn y threul+
aỽ ueỻy hyt y diwed. Yn|dieu ony pheit ef a|a y eneit y|r po+
eneu. o achaỽs kynghoruynt chwenychaỽl. nyt oes benn
idaỽ mỽ* noc y olỽyn. Camsyberỽyt yssyd aruthyrdrỽc valch+
syỽ ac a|goỻes yr engylyon a|oedynt yn|y nef egluraf a thec+
af. ac a|diheinyassant yn yn* gythreuleit gouudron yn uffer˄n
Ac etto y maent rei ohonunt ym|plith y dynyon bydaỽl yn
eu troi y ar eu hysprydolyon vedylyeu y ymrỽymaỽ y my+
ỽn pechodeu marỽaỽl. ac am hynny kyffessa di gam·syberỽ+
yt. kanys pan vo dy anustyr gorff yn|y daear yn gudyedic.
a phryfet yn bỽyta dy ystlysseu a|th gnaỽt. yr hỽnn a vuas+
sei ryvygus gynt. a|th eneit yn rỽymedic ovidyus. ac yna y
geỻy di vot yn oualus. o vot cam·ryuic eiryoet y|th gaỻon.
kanys ffieidyaf pechaỽt yng|kyfreith duỽ yỽ camsyberỽyt.
Godineb yỽ|r|gỽaeth* yỽch y daear o|r pechodeu a|r amperffeid+
yaf. Ef a|debic hokreỻỽr godinabus na anet ar eilun
dyn neb kyn|digrifet ac|mor gampus ac efo. a|r kyffredin wra+
ged godinabus a|dygant liaỽs o dynyon y uffernolyon
boeneu. Yr ysgrythur lan a|dyweit panyỽ rỽyt gythreulic
yỽ godineb. Glythineb yssyd ry gyffredin ym|plith y pobloed
yssywaeth. kanys pan vont uedwon y keiff y kythreulyeit ve+
dyant arnadunt. Pan|dynghont y waet duỽ a|e archoỻeu yn
ouer ac y diodeifyeint. am hynny y kaffant ỽynteu emelltith
duỽ
| « p 60r | p 61r » |