Breudwd Welsh Prose 1300-1425
Cymraeg

NLW MS. 3035 (Mostyn 116) – page 174v

Brut y Tywysogion

174v

Ny bu vaỽr wedy hẏnẏ yny gyrchaỽd meibon rys gasteỻ
dinbych a thrỽy vrat nos wedy torri y porth y gỽeresgyn+
assant y casteỻ ac y dodassant ef y|ghatỽryaeth gỽilim ap
gerald. A gỽedy daruot hẏnẏ y diffeithaỽd rys ap gruffud
a diruaỽr lu gyt ac ef gasteỻ ystrat kyngen. A mis mei
wedy hẏnẏ y kyrchaỽd Meredud a rys veibon gruffud y·gyt
y casteỻ aberauyn. A gỽedy ỻad y casteỻwẏr a|ỻosgi y casteỻ
diruaỽr anreith ac aneiryf o luoed a|dugant gantunt
odyno eilweith y diffeithaỽd rys gefeilaỽc drỽy vudugol+
y·aeth. Y vlỽẏdẏn hono y bu varỽ dauid ap y|moel cỽlỽm
brenh·in prydein. Y vlỽydyn hono y doeth henri tywyssaỽc
y loeger ac y gỽledychaỽd hoỻ loegẏr. Yn|y vlỽydyn hono
y bu varỽ randỽlf jarỻ caer ỻyon. Y vlỽydyn hono yd|aeth
cadeỻ ap gruffud y bererindaỽt ac yd edewis y hoỻ ve+
dyant a|e aỻu yg katỽryaeth Meredud a rys y vrodyr
yny delei ef. Y vlỽydyn hono y bu varỽ estefẏn vrenhin
y gỽr a gynheỻis vrenhinaeth loegyr y|dreis yn ol henri ap
gỽilim bastard. a gỽedy hỽnỽ y doeth henri vab yr amherodres
y loegẏr ac y kynheỻis hoỻ loegẏr. Y vlỽydẏn hono y bu varỽ
griffri ap gỽẏn. Y vlỽydyn rac ỽyneb y bu varỽ Meredud ap
gruffud ap rys brenhin keredigyaỽn ac ystrat tywi a dyfet
yn|y bymet vlỽydyn ar|hugein o|e oet gỽr a oed diruaỽr y
drugared ỽrth dlodẏon ac arderchaỽc y|gedernit ỽrth y|elynon
a chyuoethaỽc o gyfyaỽnder. Y vlỽydyn hono y bu varỽ geffrei
escob ỻan daff a rosser jarỻ henford. Y vlỽydyn rac ỽyneb
pan gigleu rys ap gruffud vot ywein gỽyned y|ewythyr yn
dyuot a ỻu gantaỽ y geredigyaỽn yn dilesc y kynuỻaỽd
ynteu lu ac y|doeth hyt yn aber dyfi ac yno y gorffoỽyssaỽd