NLW MS. Peniarth 12 part ii – page 42r

a chyving yỽ y fford a|dywys y|r uuched. ac ychydic a|gerda idi.

Eissyoes megys y dethol y golomen y graỽn pur. veỻy y dethol

crist y etholedigyon ef a|e seint dirgeledic o blith yr hoỻ gened+

loed. a rei heuyt o genedyl y ỻadron a|gymer ef. kanys duỽ a

wybu dros garyat pỽy y goỻyngaỽd ef y waet drostunt. ysgri+

uennedic yỽ. Crist a|vu uarỽ dros y rei enwir. discipulus Pa|delỽ y bu

varỽ ef gan hynny dros baỽp. Magister Crist dros y etholedigyon y

rei a|oedynt ennwir yna a|vu varỽ. dros baỽp hagen y dyweit

ef. sef yỽ hynny o bop kenedyl ac o bop ieith. ac nyt yn yr am+

ser hỽnnỽ e|hun. namyn dros baỽp rac ỻaỽ. a|thros y rei a

oedynt yn uffern. megys y dywedir. Ny|m hanuonet i onyt ar

y deueit a|goỻes ty yr israel. Ty yr israel kystal yỽ hynny a

theyrnas y rei a|welant duỽ. sef yỽ y rei hynny yr engylyon.

Y deueit a goỻet ynt yr etholedigyon y rei y doeth crist o|e pry+

nu o angeu. megys y dywedir. Mi a|ossodaf vy eneit dros vy

neueit i. dros y rei eidaỽ ef y dywaỽt ef hynny. ac nyt dros

y rei y dywaỽt ef y geir hỽnn amdanunt. Nyt ydyỽch chỽi o|m

deueit i. odyna ti a|geffy yn ysgriuennedic. dros y rei hynn yd

archaf i ac nyt dros y byt. ac eilweith y dyweit. Ti a|e kereist

ỽynt kynn gossot y byt. am y rei hynny y dywedir. hỽnn yỽ

y gỽaet a|dineuir dros laỽer. ny dyweit ef dros baỽp. Ny wna  ̷+

eth angeu crist o|les y|r rei drỽc onyt kyfyaỽn gyvyrgoỻedi+

gaeth. ac yn|y mod hỽnn y bu uarỽ ef drostunt ỽy. kanys

pob enwir yr dechreu byt a gytsynnyaỽd am angeu crist.

ac am|hynny y dywedir. Ef a|daỽ hynn oỻ o|drygoed ar y

genedyl honn. discipulus Os crist yssyd wir drugared. a|e drugar+

ed dros y hoỻ weithretoed. ac ynteu gỽedy ry dyuot y alỽ