NLW MS. Peniarth 18 – page 22r
Brut y Tywysogion
22r
kenhadeu a|orugant at Ruffud ap kynan a|o+
ed yn kynhal ynys von y eruyneit idaỽ vot
yn gyt·aruoll ac wynt yn erbyn y|brenhin
val y gellynt warchadỽ yn diofyn ynyalỽch y
gỽlat. ac ynteu drỽy gynhal hedỽch ar bren+
hin a|dyỽaỽt o|foynt hỽy y|deruynneu y|gyfoe+
th ef y|parei y|hysbeilaỽ a|e hanreithaỽ ac y gỽrth+
enebei. a|phan wybu veredud. a Meibon cadỽgaỽn
hynny kymryt kyghor a|ỽnaethant ac yn|y kyghor
y caỽssant gỽarchadaỽ* teruyneu y|gỽlat e|hunein a|ch+
ymryt eu hamdiffyn yndunt. ar|brenhin a|e luoed a
dynessayssant y deruyneu powys. ac yna yd anuones
Maredud ap bledyn ychydic saethydyon o weisson
Jeueinc y gyferbynneit y|brenhin myỽn gỽrthallt
goedaỽc ynyal ford yd oed yn dyuot Val y gellynt
a ssaetheu ac ergydyon wneuthur kynhỽryf ar y llu
ac ef a|damweinaỽd yn yr aỽr yd athoed y gỽyr Jeu+
einc hynny yr|ỽrthallt ynyal dyuot yno y|brenhin a|e
lu. ar gỽyr ieueinc hynny a|erbynnassant yno y bren+
hin a|e lu a|thrỽy odỽrd a|chynnỽryf gollỽg saetheu ac
ergydyon a|ỽnaethant ymlith a gỽedy llad rei o|r llu
a brathu ereill. Vn o|r gỽyr ieueinc a|dynaỽd yn|y vỽa
ac a ellyghaỽd saeth ym plith y llu a honno a|dygỽy+
daỽd y|ghedernit arueu y brenhin gyferbyn a|e galon
heb wybot yr|gỽr a|e byrryaỽd ac nyt argywedaỽd y
saeth yr brenhin rac daet y arueu canys llurugaỽc
| « p 21v | p 22v » |