NLW MS. Peniarth 32 (Y Llyfr Teg) – page 47
Llyfr Iorwerth
47
na|dyly gỽr talu namyn vn ebediỽ. veỻy ny
dyly gỽreic talu namyn vn amobyr. kannyt
oes idi hi ebediỽ namyn y hamobyr. Ny chyg+
hein gỽreic yn vach nac yn dyst ar wr. O|deruyd
gỽelet gỽreic yn|dyuot o|r neiỻ|parth y|r ỻỽyn.
a|r gỽr o|r parth araỻ. neu yn dyuot o wacty.
neu ydan yr|vn uanteỻ; os y|wadu a|wnant;
ỻỽ degwraged a|deugeint a|a ar y wreic. a|r gym+
eint ar y gỽr o wyr. O|deruyd. rodi kymraes y aỻtut;
ỽrth vreint yr aỻtut yd a y sarhaet hi yn* vo
marỽ yr aỻtut. a gỽedy bo marỽ ef; yny venho
hi wr araỻ. kanyt ymchoel y breint hi ỽrth
vreint y chenedyl drachefyn. O|deruyd. rodi kymra+
es y aỻtut. a bot plant meibyon udunt. y plant
a|dyly tref·tat o vamỽys. dyeithyr na dylyant
rann o|r tydyn breinhaỽl hyt y trydyd dyn.
dyeithyr mab aỻtut o bennaeth. a hỽnnỽ a
dyly rann o gỽbyl yn diannot. Meibyon y
ryỽ wraged hynny y telir gỽarthec dyuach
o·nadunt. ac y·sef achaỽs y gelwir ỽynt ueỻy.
ỽrth vot yn dir y genedyl y uam meichaỽ ar+
nadunt a|e talu. kannyt oes genedyl tat
a|e talho. Ny dyly gỽreic prynu na gỽerthu
heb gannyat y gỽr. o·ny byd priaỽt. ac o byd
hi a|dyly prynu a gỽerthu. O deruyd. rodi morỽyn
y wr; ac na ovynher y chowyỻ kyn kyuodi
| « p 46 | p 48 » |