NLW MS. Peniarth 45 – page 201
Brut y Brenhinoedd
201
Ac aruer o gysgaỽt y deri yn gochel ergyt+
yeu y brytanneit. Ac gwedy gwelet hyn+
ny o arthur Erchi a wnaeth trychu y gwyd
o|r parth hỽnnỽ yr llỽyn a gossot y gwyd
hynny yn gae yn eu kylch mal na cheff+
ynt uynet o·dyno yny ymrodynt yn e+
wyllis arthur. Neu yny uydynt uarỽ o
newyn. Ac gwedy gỽneuthur y caer
rannu y bydinoed yg kylch y llỽyn. Ac y
uelly y gwarchayỽyt teir nos a|thri dieu
ac gỽedy nat oed dim bỽyt gan y saesson
anuon kenadeu a wnaethant at arthur
y erchi idaỽ eu hellỽng ymdeith yỽ llogeu
yn ryd. Ac adaỽ idaỽ ynteu eu heur a|e
haryant a|e holl sỽllt. A theyrnget pob
blỽydyn o germania a gỽystlon
ar hynny. Sef y cauas yn|y gyghor kym+
ryt hynny gantunt. A|e canhadu ymde+
ith yn ryd. A phan yttoedynt yn rỽygaỽ
moroed y bu ediuar gantunt gỽneuthur
yr amot hỽnnỽ ac arthur. A throssi y hỽyly+
eu y ynys prydein a|dyuot y traeth tot+
neis yr tir. Ac anreithaỽ y gỽladoed hyt
ym mor hafren. A cherdet hyt caer uadon
racdunt ac ymlad a hi. Ac gwedy mene+
| « p 200 | p 202 » |