Oxford Jesus College MS. 119 (The Book of the Anchorite of Llanddewi Brefi) – page 26v
Ystoria Lucidar
26v
pann ladher. O dryc annyan y|mae drỽc. prio+
das gyfuyaỽn da yỽ. Godineb hagen yn erbyn
kannyat. drỽc yỽ. Ac am eu dial trỽy gyfy+
aỽnnder. y|trossir wynt ar volyant y|duỽ.
A megys y|molir arglỽyd a|dalo ev llauur o|e
varchogyonn. mỽy y|molir o|diua yr herỽyr.
Ar lladronn. vrth hynny gogonedus yỽ duỽ
o Jachau y|rei gỽiryon. A|molyannus yỽ o|gyfuyr+
golli y|rei ennwir. Yscriuennedic yỽ. na|chassa+
ỽd duỽ dim o|r a|wnnaeth. Pa|delỽ y|gellir dyỽe+
dut karu o|duỽ yntev y|rei da. a chassav y|rei drỽc.
Ef a|gar duỽ pob peth o|r a|greaỽd. Ac ny dodes
ef pob peth yn vn. A megys y kar y lliỽyd pob
lliỽ. a rei a|vyd hagen hoffach gantaỽ noe|gilyd.
Velly y ryd ef bop vn yn|y lle y|gwedho. Ac vrth
hynny y|dyỽedir carỽ o|duỽ y|nep a|erbynnho
ef y|lys nef. A chassav ohonaỽ y|rei a|ssodho yn
vffernnaỽl garchar. Beth yỽ ryd ewyllys.
Ridit y deỽissaỽ y da. nev drỽc. a hynny a gauas
y|dyn kynntaf ym paradỽys. Ac yn|yr amser hỽnn
ny dichaỽn neb wnneuthur da. nae deỽissaỽ
hep gaffel rat y|gann duỽ. Beth a|dyỽedy di am
y|neb a|gymero abit creuyd. ac odyna ymchỽe+
lut yr byt dracheuen gỽedy eu proffes. Rei a|de+
chreuho wnneuthur da. Ac odyno ymchỽelut
| « p 26r | p 27r » |