NLW MS. 3035 (Mostyn 116) – page 54v
Brut y Brenhinoedd
54v
eu gelynyon. Ac o|r diwed ỻithraỽ a|oruc gỽyr rufein a
ffo yn dỽy ran. Ac y|kyrchỽys gloyỽ ar neiỻ ran yn vriỽ+
edic gantaỽ y|ỽ ỻogeu a|chymryt y|diogelỽch megys
o|r kestyỻ Ac anuon y ran araỻ gantaỽ a gyrchỽys
y coet. kany chauas o|yspeit mynet y|ỽ ỻogeu. A|the+
bygu a oruc gỽeryd bot gloyỽ yn fo y|r coet y·gyt a
hamo. Ac ỽrth hẏnẏ ny orffoỽyssỽys. gỽiryd oc eu
hymlit o le y le yny gordiwaỽd ar lan y mor y|ỻe a
elwir o|e enỽ ef norhamtỽn. Ac yno yd oed porthua
adas y disgynuaeu ỻogeu Ac val yd oed hamo yn
kaffel y|ỻogeu. nachaf weiryd yn dyuot yn deissyfyt
am eu pen. Ac yna ỻad hamo Ac yr hyny hyt hediỽ
y gelwir y borthua honno norhamtỽn yn saesnec a|phorth
hamo yg|kymraec
A c yna gloyỽ amheraỽdyr rufein gỽedy kynuỻaỽ
yr hyn a|diaghyssei o|e lu ac ymchoelut drache+
fyn. Ac yn ymlad a|r dinas a|elwit yn|yr amser
hỽnnỽ kaer beris. Ac a|elwir yr aỽr hon porchestẏr
Ac yn dianot gỽedy kaffel y gaer a|e gỽeresgyn a
gỽasgaru y|muroed kychwyn a|oruc yn ol gỽeiryd
a athoed hyt yg|kaer wynt. A gỽedy y dyuot hyt
yno dechreu ymlad a|r gaer. A mynu gỽarchae
gỽeiryd hyny delei ẏn|ẏ ewyỻys rac newyn. A|phan
welas gỽeiryd y|warchae yn|y dinas. kyweiraỽ y lu
a oruc yn vydinoed a|chyrchu aỻan ỽrth rodi kat ar
vaes y|r amheraỽdyr a|e lu A|phan welas yr amheraỽ+
dyr ef mor diuygỽl a hẏnnẏ Sef a|wnaeth anuon
attaỽ y geissaỽ tagnefed a|duundeb y gantaỽ. kanys
ofyn oed gantaỽ gleỽder a|chedernit y|brytanyeit Ac
ỽrth hynny diogelach vu gantaỽ drỽy|synwyr a doeth+
| « p 54r | p 55r » |