NLW MS. 3036 (Mostyn 117) – page 54
Brut y Brenhinoedd
54
athrugar y ueint y ỽrth vor iwerdon a dechreu llyncu
a gyfarffei ac ef o dynyon. Ac yd aeth ynteu e hun
y ymlad ac euo. A guedy treulaỽ y arueu yn ouer;
y kyrchỽys yr aneueil ef a|e lyncu mal pyscodyn.
Ac o hynny allan ny welet nac ef na|r aneueil. A
phym meib a uu idaỽ. A|r hynhaf oed Gorboniaỽn
A hỽnnỽ a gymyrth llywyodraeth y teyrnas. A hỽn+
nỽ tagnouedus ac araf oed. Ac ym blaen pop peth
y talei teilỽg anryded y|r dỽyeu. Ac vnyaỽn wiry+
oned y|r bobyl. Ac atnewydhau temleu y| dỽyeu
a|r dinassoed a oruc. A guneuthur ereill o newyd.
Ac yn yr amser hỽnnỽ kymeint uu amhylder eur
ac aryant a goludoed ereill; ac nat oed un o|r ynys+
soed a allei kyffelybu idi. Ac ym|plith hynny oll y
kyuoethogei ynteu yn hael paỽb o|r tlodyon mal
na bei reit y neb wneuthur treis na lledrat na chri+
bdeil ar y| gilyd. A guedy marỽ Gorbonyaỽn yn llun+
dein; y drychauỽyt arthal y uraỽt yn vrenhin. Ac
anhebic uu yỽ vraỽt kyn noc ef. y bonhedigyon
a ystygei. A|r anlyedogyon a urdei. A guedy na allỽ+
ys y dylyedogyon y diodef. duunaỽ yn| y erbyn a|e
diwreidaỽ o gadeir y teyrnas y ymdeith a| wnaeth+
ant. A dodi elidir y vraỽt yn| y le. Ac ym pen y pym
blyned; guedy y uot yn vrenhin. yd oed yn hely
fforest lỽyn y kaladyr. nachaf arthal y uraỽt y| gỽr
a deholassit o|e vrenhinyaeth guedy ry uot yn crỽy+
draỽ guladoed ereill am borth y| geissaỽ y gyfoeth
| « p 53 | p 55 » |