NLW MS. Peniarth 11 – page 16v

y bed calettrỽm a|oed yn kudyaỽ y marỽ a arỽydokaa y kale+

di a|gafas iessu grist yn|y byt hỽnn. kanys yn yr amser hỽn+

nỽ nyt oed y|r mab y·chweith o|r tat yn gywir. nac y|r tat nyt

oed gywir y mab. kanys yr|oedynt yna y mab val y tat yn

adeilyat udunt dỽyweu o newyd beunyd. Ac yna y|tat o|nef

pan welas ef ennwired kymeint a hynny ar y dayar ym

plith y bobyl. ynteu a|anuones y vn mab ef y|r dayar y geis+

syaỽ atnewydu medylyeu eu kallonneu ỽy. Eissyoes haỽs

oed idaỽ medylhav y creigyeu kalettaf noc eu callonneu ỽy. O|r

achaỽs y dywaỽt dafyd broffỽyt gynt oherwyd proffỽydolya+

eth am iessu grist. Ef a|vyd gỽaetlyt hyt ar angheu. Ac me+

gys y doeth duỽ y|r byt hỽnn yr rydhau pobyl dynaỽl. o|r gret

drỽc a|r anturyeu blin a|oed arnadunt. veỻy y gaỻỽn dyaỻ ~

drỽy gyffelybrỽyd ry anuon o iessu grist ditheu yn varchaỽc ur+

daỽl idaỽ. y vỽrỽ anturyeu a|defodeu drỽc a|oed yn teyrnas loe+

gyr. Ac megys y proffỽydỽyt y deuei iessu grist y vỽrỽ kam+

gret ac anturyeu drỽc y arnam. Veỻy y proffỽydwyt y deuyt

titheu y orffen yr anturyeu a|r drycdynghetuenneu yssyd yn

yr ynys honn. a|bendith duỽ ar y|dynghetuen a|th anuones

y|r byt hỽnn attam ni. A|ỻyna ytti beth a|arỽydokaa y bed.

Yr eil y korff a|oed yn|y|bed. yr hỽnn a eỻir y gyffelybu y|r bo+

byl. neu yntev y|r eneidyeu a|oed dan y kaledỽch wedy kaledu

o bechodeu a ry daroed udunt eu gỽneuthur. ac arwyd vu eu

bot ỽy y|myỽn pechodeu. kanys gỽedy dyuot Jessu grist attunt

y|r dayar. ỽynt a debygassant panyỽ pechadur megys vn o  ̷+

nadunt ỽy e|hunein oed ef. ac heb gredu idaỽ ỽynt a varnassant

arnaỽ.