Cardiff MS. 1.362 (Hafod 1) – page 102v
Brut y Brenhinoedd
102v
a trigassant yno. A phan gauas yr anlyedogyon
medyant y gwyr bonhedic; ymdyrchauel a|wna+
ethant ỽynteu yg ham ryuyg. a cham syber+
wyt yn vỽy noc y canhadei dylyet. Ac o ormo+
dyon kyuoeth a drych y llỽy a golut; ymrodi y
odinab megys y dyweit gildas; hyt nat mỽy y
pechaỽt hỽn; no phop pechaỽt o|r a uyd ym plith
y kynedloed; Ac yn penhaf peth a distryỽ yr holl
da. Cassau gỽiroed*. A charu kelwyd. A thalu drỽc dros
da. Eredeu* enwired dros hegarỽch. Ac y·uelly y gỽ+
neynt pop peth yn ỽrthỽyneb yr wirioned. Ac ny
cheissynt dim gan vedyc yr holl nerthoed; Ac y
gyt hynny; hyt nat mỽy y gỽnaei y dynyon y
byt hynny; namyn meneich ar eglỽyswyr. a chen+
uein duỽ e hun; Ac ỽrth hynny nyt ryued bot
yn gas duỽ y genedyl y wnelei y ryỽ distryỽ
weithredoed hynny; Ac o|r achaỽs hỽnnỽ colli o·nadunt
tref eu tat ac eu gỽlat. kanys a oed yn mynnu dỽyn
estraỽn genedyl y dial arnadunt eu pechodeu. Ac eissoes
teilỽn oed pei duỽ a|e canhattaei keissaỽ kenydu eu bre+
int ac eu teilygdaỽt; Ac y vỽrỽ gwaradỽydyt y ỽrth
au priaỽt genedyl mal na ellit dywedut an bot yn
tywyssogyon llesc; na gwallus. mal na lauuryem
y geissaỽ bỽrỽ gwradỽydyt* y ỽrthym. Ac yn ach+
wanec y hynny. hyach ac ehofnach yd
archaf vi dy canhorthỽy ti. noc vn arall. kanys
vn gorhentat a vu yn an|deu. Ac velly dỽyn y hach
AC yno y trigỽys katwallaỽn [ a|wnaeth yn dec.
y gayaf hỽnnỽ y gyt a selyf vrenhin llydaỽ.
| « p 102r | p 103r » |