NLW MS. Llanstephan 27 (The Red Book of Talgarth) – page 14r
Ystoria Lucidar
14r
ac na loewheir y tywyn yr y creiryeu. discipulus Paham y byd drỽc da
kymeint a|hỽnnỽ y|r neb a|e kymero. Magister Am y gymryt dros
wahard. kanys gỽahardedic yỽ y gymryt ef yn anteilỽng.
nyt oed vn aual drỽc ym|paratwys. ac eissyoes ef a|drosses yn
drỽc y dyn am y gymryt y gan y kythreul. discipulus a aỻant ỽy dang+
neuedu a|duỽ dros y bobyl. Magister Ys mỽy y kodant ef. kanys ha+
logi y kyssegyr a|wnant pan y sathront. ac halogi y gỽisgoed
a|r ỻestri kyssegredic pan y teimlont. aruthyr a|ffieid vydant
gan yr engylyon. a|r|engylyon yn ffo racdunt. discipulus a wna duỽ
megys y|dywedir y veibyon. Magister Nyt y veibyon a|e ỻidyant ef
am y budredi. ỽrth hynny med yr arglỽyd. Mi a gudyaf vy wy+
neb y ỽrthunt ac racdunt. Y veibyon y geilỽ ef ỽynt o achaỽs
eu hoffeiryataeth. ac am eu budred ỽy y dyweit ef nat y veiby+
on ynt. ac ny ch·ymer duỽ eu haberth ỽy. namyn y ffieidyaỽ
megys y|dywedir. vy eneit i a gassaa aỽch aberth chỽi med yr
arglỽyd. kanys bara halaỽc a|offrymassaỽch ym. a|chan·ny
aỻer halogi corff yr arglỽyd. herỽyd a|allont ỽy ef a|halogir yn
anosparthus. a megys bara araỻ y kymerant ỽy. Ny chymer+
ir hagen eu gỽedi ỽy. namyn yn bechaỽt udunt y byd. kanys
ny|s gỽerendeu duỽ ỽynt o dim. a|e bendith a|drossir udunt yn
emeỻtith. megys y dywedir. Mi a|drossaf aỽch bendith chỽi yn e+
meỻtith yỽch med yr arglỽyd. discipulus A gymerant ỽy gorff yr arglỽ+
yd. Magister Meibyon duỽ e|hun a|e kymerant a|r rei nyt ydiỽ duỽ y ̷+
gyt ac ỽynt. kyt gỽeler eu bot yn|y dodi yn eu geneu. ny chym+
merant ỽy namyn engylyon a|e dỽc y|r nef. a chythreul a|vỽ+
rỽ marworyn uffernaỽl yn eu geneu ỽynteu yn|lle bara ud+
unt. a gỽenwyn dreigyeu yn lle gỽan. megys y dyweit tiprianus.
| « p 13v | p 14v » |