Breudwd Welsh Prose 1300-1425
Cymraeg

NLW MS. Peniarth 18 – page 39v

Brut y Tywysogion

39v

a|ỽnaeth y erchi y ioruerth ap yỽein dyuot y|ym+
ỽelet ac ef. Ac y ymdidan am hedỽch a rodi ca+
darnn gygreir a oruc idaỽ ac o|e ueibon. A phann
yttoed yỽein ap ioruerth gỽas Jeuanc grymus
hegar yn ymparatoi o gygor y|tat a|e ỽyrda y
vynet ygyt a|e tat y lys y brenhin y kyfaruu
ỽyr iarll brustaỽ ac ef ar y fford yn|dyuot o|ga+
er dyf. Ac y|lladassant. A gỽedy y lad ef. yna y
diffeithaỽd y|tat. a hyỽel y|uraỽt. a llaỽer o
rei ereill hep ymdiret o|r achos hỽnnỽ yr bren+
hin o neb un uod. kyuoeth y|brenhin hyt yn
henfford. a chaer loyỽ drỽy lad a|losci*. ac anre+
ithaỽ hep trugared. Ac yna hep odric yd aeth
y|brenhin y|ffreinc ỽedy gossot yr arglỽyd rys
yn iustus yn holl deheubarth. Yg|kyfỽryg hyn+
ny y|delit seisyll ap dyfynỽal. a ieuan ap se+
issyll ap ridit trỽy dỽyll y|gann ỽyr y brenhin.
Ac y carcharỽyt yg|kastell aber geuenni. Y|ulỽ+
ydyn racỽynep y|bu diruaỽ* ardymer a|hinda
ar|hyt y|gayaf ar gỽannhỽyn. A mis mei hyt
dyỽ ieu kyfarchauel. ar dyd hỽnnỽ y|kyuodes
diruaỽr tymestyl yn|yr aỽyr o taran a mellt
a chorỽynt. A|chaỽadeu kennllysc. A glaỽogyd.
y|rei a|torres kageu y|gỽyd. Ac a|uriỽaỽd y|co+
edyd hyt y|llaỽr. a ryỽ bryuet a|deuth y|ulỽy+
dyn honno y yssu deil y|gỽyd yny diffrỽythaỽd