NLW MS. Peniarth 32 (Y Llyfr Teg) – page 152
Llyfr Iorwerth
152
bot ychen claf; ae o vriỽ ae o peth araỻ; Jaỽn
yỽ y|r perchennaỽc kynnal penn yr ieu. O|deruyd
y dyn mynnu gỽerthu ych o|r kyuar ry gyua+
rer yndaỽ; ny dyly na|e werthu na|e drafnitraỽ
yny darffo y kyuar. ac os|gỽerth kynn vn dyd
no chaffel y erỽ; coỻi y erỽ. ac os|gỽedy kaffel
y erỽ; kynnal penn yr ieu. Paỽp a dyly dỽyn
y defn·ydyeu y|r maes nac ych na heyrn na
phetheu ereiỻ a vo idaỽ. Gỽedy y|del pob peth
attunt; yr amaeth a|r geilwat bieu cadỽ pob
peth o|r rei hynny yn diwaỻ. a gỽneuthur
udunt kystal ac yr eidunt e|hun. Y geilwat
a dyly kaeu ar yr ychen yn diwaỻ ual na bo
ry gyuyg arnadunt. ac o deruyd drỽc ud+
unt yn hynny o vessur; ef bieu eu talu. neu
ynteu y lỽ na wnaeth udunt waeth noc y|r
eidaỽ e|hun. Ny dyly yr amaeth na thaflu yr
ychen nac eu briỽaỽ. ac os|briỽ; talet. neu
wadet. Yr amaeth a|dyly kymhorth y geilw+
at o daly yr ychen. ac ny dyly goỻỽg namyn
y deu verrewys. Gỽedy darffo y kyueir paỽp
a dyly kyrchu y defnydyeu attaỽ adref. Kartỽr
na march ỻyuyn ny hanyỽ o kyfreith. Ny dyly neb
dodi gorysgỽr ar ych neb heb y ganhat.
neu o|e ewyỻys. O|deruyd. bot amrysson y·rỽng
deu gyuarỽr am|drycar; edrycher erỽ yr ama+
eth.
| « p 151 | p 153 » |