Breudwd Welsh Prose 1300-1425
Cymraeg

NLW MS. Peniarth 32 (Y Llyfr Teg) – page 254

Brut y Saeson

254

vyd hỽnn deg|mlỽyd oed pan ry|gigleu lad y ỽraỽt
a dechreu ỻefein ac ỽylaỽ a oruc. A|e vaedu a oruc
y vam a|r tapren kỽer o eissei gỽialen. Ac o achos
hynny ny odeffei vyth eu|goleuhau rac y ỽron o|e vod
hỽnnỽ y bu tri meib nyt amgen. Edmund ystlys
hayarn. ac aluryt. A seint Edwart. Ac ef a|gymerth
yn ỽreic idaỽ Em verch Ricard y|tyỽyssaỽc kyntaf o
normandi. Roỻo hagen a vu gyntaf tyỽyssaỽc ar normandi
Ac y hỽnnỽ y bu vab a elỽit Wiỻiam long sperus. Ac
y hỽnnỽ y bu vab Rycard tat Em. Ac y hỽnnỽ y bu
vab Ricard araỻ. Ac y hỽnnỽ y bu veibyon y tryded
Ricard. a Robert. Ac y Robert hỽnnỽ y bu vab Gwilym
bastard y enỽ o orderch idaỽ a elỽit Arlot. A|e deduoli
a gafas drỽy lys ruffein. Ac veỻy yd oed seint Edwart
a gwilym bastard yn gefynderỽ ac yn gyferderỽ.
Dỽy vlyned ar|bymthec ar hugeint y gỽledychaỽd.
Ac yna gyntaf y deuth yswein y|r tir. Ac anreithaỽ
a ỻosgi a goresgyn y ỽlat yn gỽbyl a ỽnayth. [ vn
ỽlỽydyn ar|bymthec a mil oed oet crist pan ỽledychaỽd
Edmund ystlys hayarn. ỽedy marỽ yswein A|r edmund
hỽnnỽ a reuelaỽd yn erbyn Cantỽn vrenhin denmark
Ac a|e gyrraỽd o loeger ef a gỽyr denmark ac ydaỽ
y bu vab a elvit Edwar˄t yr hỽn a foes y ỽlat
hỽggaria ỽedy marỽ y dat Ac y priodes chỽaer
brehin* hỽnggaria. ac y bu idaỽ o·honei. Edgar
Ethlinger a Margaret gỽreic y moel Cỽlỽm brenhin