NLW MS. 3036 (Mostyn 117) – page 169
Brut y Brenhinoedd
169
ryỽ ynuytrỽyd hỽn. Py achaỽs debygỽch i y bei
well mein iwerdon; no mein ynys prydein. pan
delhynt y|gymhell kenedyl iwerdon ar ymlad
yn eu herbyn o achaỽs y kerryc hynny. Guiscỽch
ymdanaỽch heb ef guiscỽch. Ac ymledỽch dros
aỽch gulat. Ac amdiffynnỽch cor y kewri. kanys
a miui yn uyỽ ny chaffant ỽy vn greenyn onad+
unt ỽy. A|phan weles vthyr pendragon y|gỽy+
dyl yn paraỽt y ymlad ac ỽynt. Sef a|wnaeth yn
teu yn diannot eu kyrchu ỽynt ynyd oedynt
paraỽt y bydinoed. A heb hayach o hir goruot
o|r bryttaneit. A guedy llad y gỽydyl ac eu briwy+
aỽ. kymhell gillamỽri ar ffo. A guedy goruot ar
y gỽydyl. yd aethant y brytanyeit hyt ymynyd
kilara y lle yd oed y mein yr dothoedynt y eu ke+
issaỽ. A llawen uuant o welet y mein. A guedy
dyuot myrdin a|phaỽb ygyt. y|dywaỽt ỽrthunt
val hyn. A wyrda heb ef aruerỽch weithon oc
aỽch cryfder a dangossỽch aỽch deỽred wyr ieue+
inc. A cheissỽch diot y mein. Ac odyna edrychỽch
peth a uo goreu a|threchaf a|e nerth a|e ethrylith.
Ac ar hynny yd ymrannassant trỽy arch vyrdin.
Ac yd ymrodassant paỽb onadunt y eu holl ne+
rthoed trỽy amryualyon geluydodeu y geissaỽ
tynnu y mein. Ac eissoes yr hynny ny chyffroes
vn o|r mein o|e le. Ac yna guneuthur o·honaỽ
ynteu y peiranheu a|e geluydyt. Yn haỽs noc
| « p 168 | p 170 » |