NLW MS. 3036 (Mostyn 117) – page 218
Brut y Brenhinoedd
218
A chymeint yỽ arnaf sychet eu guaet a chyt bydỽn
heb diaỽt teir nos a thri dieu ac yn guelet y ffynha+
ỽn rac vym bron. Arglỽyd heb ef guyn y vyt a ar+
hoei y dyd hỽnnỽ. yn yr hỽn y| gallem ni ymgyfar+
uot ac ỽynt. Melys awelioed uydei y| genhyf| i yr
rei a| gymerhỽn. tra uydỽn inheu yn keissaỽ dial
vy ryeni am kenedyl. Ac yn amdiffyn an gulat
ac an rydit. Ac yn drychauel an brenhin. Ac y| ach+
wanegu dy lu titheu arglỽyd heb ef yr neges hon.
mi a| rodaf dỽy vil o varchogyon ar+
uaỽc heb eu pedyt. A guedy dywedut o paỽb y dull
a|e parabyl. Adaỽ a| wnaeth paỽb yn herwyd y gyf+
oeth y nifer goreu a allei yn porth y arthur. Ac y+
na y kahat o ynys prydein e| hun heb yr hyn ad+
aỽssei hywel vab emyr| llydaỽ tri vgein mil o| var+
chogyon aruaỽc. Ac o|r ynyssed nyt amgen iwer+
don ac islont a Godlont ac orc a| llychlyn a denmarc
y rifỽyt whe vgein mil o pedyt. kanyt oed ar er
o varchogyon gantunt. Ac o ffreinc nyt amgen
o rỽytun. A phorthun A nordmandi a cenoman a
pheitaỽ Ar angiỽ y riuỽyt pedwar vgein mil o| var+
chogyon aruaỽc. Ac y gan y deudec gogyfurd o fre+
inc y riuỽyt deu can mil o varchogyon aruaỽc.
Sef oed eirif hynny oll ygyt o varchogyon. deu
cant. A their mil a phetwar vgein mil. A chan mil
heb eu pedyt. yr hyn nyt oed haỽd eu gossot yn rif.
A guedy guelet o arthur paỽb ymrodi yn llawen
| « p 217 | p 219 » |