NLW MS. 3036 (Mostyn 117) – page 42
Brut y Brenhinoedd
42
vab porrex. a fferuex. A guedy marỽ eu tat y kyfo+
des teruysc y·rydunt am y urenhinyaeth. A cheissaỽ
o porrex llad feruex o vrat. A guedy gỽybot hynny;
o feruex ffo hyt yn ffreinc a oruc. A dyuot a| phorth
y gan suardus vrenhin freinc ac ymlad a phor+
rex y uraỽt. Ac yna y llas ef a|r gynnulleitua a
doeth gantaỽ. A guedy gỽybot o|e vam llad y mab.
Sef a wnaeth hitheu keissaỽ llad y mab byỽ yn lle
y| mab marỽ. A guedy y| gaffel yn kyscu o·honei yd
aeth hi a|e morynyon a|e lad. Ac yna y rannỽyt
yr ynys yn pymp ran trỽy duundeb y guyrda.
AC ym|pen guers y kyuodes guas clotuaỽr.
Sef oed y enỽ dyfynwal moel mut mab cly+
dno tywyssaỽc kernyỽ. A guedy marỽ clydno a
chaffel o dyfynwal y gyuoeth; ryuelu a oruc ar
pymer brenhin lloegyr. A guedy llad pymer;
y duunassant yn| y erbyn. Nidyaỽc brenhin kym+
ry. Ac statter brenhin y gogled. A dechreu llosci ky+
uoeth dyfynwal a|e anreithaỽ. A dyuot a oruc dyf ̷+
ynwal a deg mil o wyr aruaỽc gantaỽ yn eu her+
byn a rodi kat ar uaes udunt. A guelet o dyfyn+
wal hỽyret yd oed yn kaffel y uudugolyaeth. dỽ+
yn attaỽ whechanhỽr o|r guyr deỽrhaf idaỽ a oruc
A guiscaỽ ymdanunt arueu y| guyr a| ladyssit oc
eu gelynyon a| cherdet trỽy eu gelynyon yn rith
ketymdeithon vdunt hyt y lle yd oed nidyaỽc
ac stater. Ac ym perued eu bydin eu llad. Ac yna
| « p 41 | p 43 » |