NLW MS. Peniarth 11 – page 8v
Ystoriau Saint Greal
8v
Arglỽydes heb ef ny|s|gỽnn. Arglỽyd heb hitheu na chel|di
kanys nyt reit itt vn kewilyd yr|dywedut y enỽ. kanyt oes
milỽr weỻ noc ef. Ac ynteu a henyỽ o vrenhined. A|phan
gigleu galaath y parabyl hỽnnỽ. kymryt kewilyd maỽr
a|oruc. ac rac kewilyd y hattebaỽd hi yn|y mod hỽnn ~
Arglỽydes heb ef kanys adwaenost di enỽ yn gyn ˄ysbysset a hynny.
ti a|eỻy dywedut im pa vn yỽ ef. Ac os ef yỽ y neb yd ỽyf|i yn
tybyeit y vot yn|dat im. mi a|gyttuunaf a|thi. Myn enỽ
duỽ heb hitheu mi a ˄e managaf itt. y enỽ ef yỽ laỽnslot dy
lac. y|teckaf o|r marchogyon urdolyon. a goreu a hoffaf gan
baỽb y|welet a haỽssaf y garu o|r a|anet eiryoet y|n amsero+
ed ni. ac am|hynny ef a|welit ymi na|dylyut ti kelu y enỽ
ef nac ragof|i nac rac araỻ. arglỽydes heb ynteu kanys ̷
atwaenut titheu ynteu y pa|beth y dywedỽn i. Ac ueỻy y
buant hỽy yn ymdidan yny yttoed yn ỻawer o|r nos. Ac yna
arthur e|hun a|gymerth galaath ac a|e harwedaỽd y ystaueỻ e
hunan. Ac yng|gỽely arthur y kysgassant eỻ|deuoed y nos hon ̷+
no. Ac yn eu hymyl ỽynteu laỽnslot a gỽalchmei a|orwedas ̷+
sant eỻ|deuoed y·gyt. A|r ỻeiỻ oỻ a|aethant paỽb o|e letty yn
uedylgar drist bop rei ohonunt. A|phan ranghaỽd bod y|n
harglỽyd ni iessu grist mynet y|nos ymeith. a|dyuot y|dyd.
paỽb a|gyuodassant y vyny ac a|wisgassant eu|harueu. Ac
yna arthur a|doeth att laỽnslot a|gỽalchmei. ac a|dywaỽt.
Gỽalchmei heb ef pei araỻ a|dlodei vy ỻys i yn|y mod y
tlodeist di ny bydỽn vodlaỽn idaỽ. kanys yd|ỽyt yn|dỽyn y
ỽrthyf y kỽmpaeni teckaf o|r a|uu ygyt ac arglỽyd na brenhin
eiryoet.
| « p 8r | p 9r » |