NLW MS. Peniarth 9 – page 59r
Ystoria Carolo Magno: Chronicl Turpin
59r
*o|r cristynogyon a oydynt yn llechu yn|y llỽy+
neu. neu a glywei neb o|r athoydynt byrth yr
yspayn val y delynt ỽrth y agheu y gymryt
y varch a|y gledyf. ac y ymlit y sarascineit
Ac yna y cant yr eliffant y gorn yn kyn
gadarnet. ac yny holltes y gorn yn deu han+
ner. A|thorri y dỽy waytỽythen. Ac ef a|dywe+
dir torri gieu y mynỽgyl idaỽ yna. A llet
y corn a duc agel o nef o·dyna hyt y lle yd
oyd charlymayn yg|glyn y meiri ỽyth mill+
tir y wlat yno y tu a gỽasgỽyn y lle yd oyd
charlymayn yn pebyllaỽ. Ac yn diannot y
mynnassei charlymayn ymhoylut o|y nerth+
aỽ. nac ef arglỽyd heb y gỽenwlyd kan oyd kyf+
rin ef am agheu rolond. Gỽybyd di heb o|r
achaỽs lleiaf y kenit y korn ac nat reit idaỽ
ef ỽrth dy ganỽrthỽy di. namyn hela aneueil
gỽyllt y may. ac am hyny y cant y corn. Ac kyg+
hor y bradỽr y tewit yna am rolond. Ac yna y
dywanaỽd baỽtwin y vraỽt ar rolond yn|y lle yd
oyd yn ymgreinaỽ ac yn damunaỽ dỽfyr ac ny|s
cauas y vraỽt idaỽ yn vn lle. Ac yna erchi y
vendith a oruc y vraỽt. Ac ysgynnu a oruc ar
y march rac y gaffel o|r sarascinneit a mynet
yn yd oyd charlymayn. A phan ayth baỽtwin
ymeith y doyth attaỽ ynteu teodoric a|y gyffes+
su a|y dysgu y ymeiryaỽl a duỽ. Ac ner* dar+
oyd y rolond y dyd hỽnnỽ kymryt corff y ar+
glỽyd a|chyffessu yn llỽyr ỽrth effeireit kanys
The text Ystoria Carolo Magno: Chronicl Turpin starts on line 1.
| « p 58v | p 59v » |