NLW MS. Llanstephan 27 (The Red Book of Talgarth) – page 177v
Gwyrtheu Mair
177v
esgob kyssegredic dra|e|gevyn y|r mynyd. a|deffroi paỽp o|e
gedymdeithon. a menegi udunt y weledigaeth ef a|thruga+
red duỽ a|e vam. A gỽedy cỽplau yr hoỻ nos honno yng|gỽ+
edieu. pan doeth y bore drannoeth y sant a|e ysgolheigyon
a|e bobyl a gerdaỽd y verthyrolyaeth y gỽynuydedic ver+
cur. ac yn|y ỻe hỽnnỽ yng|gỽyd paỽp y kafas ef arueu y
kyssegredic vercur. ac yn|y ỻe y gnottaei ef vot y leif yn
greulet o waet. Ac ỽrth hynny paỽp o·nadunt ỽyn+
teu a|deaỻassant ry lad o·honaỽ ef y brenhin creulaỽn
a phaỽp o·nadunt a|gymerth yr eidaỽ. ac a|dalassant
diolỽch y eu duỽ ac y uam ynteu. Ef a|dywedir hagen
pan yttoed Julian apostat ar y varch yn annoc ac yn
ỻymhau bryt y rei eidaỽ ar vrỽydyr ac ymlad. ar hynny
yn deissyfyt nachaf uarchaỽc y ar varch kanwelỽ. ual
y kymheỻei yr ysparduneu yn ymdangos y|r amheraỽ+
dyr e|hun. ac yn gossot arnaỽ a|gỽaeỽ y·dan y vronn. ac
ual y kilya yn|difflannu y ganthaỽ. ac ual y ret y gỽaet
o|r weli ỻoneit y laỽ a|gymerth Julian apostat o|e bria+
ỽt greu. a|e vỽrỽ yn|yr awyr. a dywedut. Neur oruuost
y gỽr o nazareth. neur oruuost. am y vuched anteilỽng
y teruynwyt y gỽr hỽnnỽ o angeu anheilỽng.
E f a|dywedir kyrchu y mor o toỻo y tywyssaỽc
kyntaf o|r normanyeit. ac y·chydic o niuer gyt
ac ef o|r gorỻewin y vynnu goresgyn y tir a|elwit gỽedy
hynny nor·mandi. A gỽedy y dyuot y|r tir. gỽneuthur
o ffreingk aneiryf aerua. a|dyuot a|ỻu maỽr ganthaỽ
yng|kylch dinas carnotỽm. yn|y ỻe yd oed eu harchesgob walch+
elin.
| « p 177r | p 178r » |