NLW MS. 3035 (Mostyn 116) – page 15v
Ystoria Dared
15v
parth. A|mynet a|wnaeth gỽyr goroec y|edrych cestẏỻ
gỽyr troea. a gỽyr troea yn edrych cestyỻ gỽyr goroec
ac odyna palamides a anuones a·gamemnon y les+
peus at teslus y rei a|wnaethoed agamemnon kyn
no hyny yn genadeu idaỽ y gyweiraỽ bỽyỻyryeu ac
y|dỽyn gỽenith o voetia y|gan telephus idaỽ a|phan
deuth a·gamemnon yno ef a|datkanỽys brat palamides
yn|y gyfeir udunt a|thrỽm vu gantaỽ hẏnẏ ac ynteu
a|dywaỽt nat drỽy volest nac y|dreis arnaỽ ef y|du+
gẏssit yr amherodraeth rac·daỽ. namyn y|gỽrthot
ohonaỽ ef o|e rỽyd ewyỻus e|hunan ac ef a|erchis v+
dunt ỽy baratoi bỽyỻyryeu a ỻenwi eu ỻogeu ohonaỽ
ac yna yd|oeth palamides ynteu yn kadarnhau y kestyỻ
ac eu kylchynu o|dyred a muroed kadarn a|gỽyr troea
a ouynassant pa·ham yd oed gwyr goroec yn|ỻuydaỽ
ac yn adnewydu y|muroed ac yn achwenackau clodẏeu
ac yn kyweiraỽ pop peth mor garedic a|hẏnẏ ac wedẏ
ymwahanu o|wyr troea a|gỽyr goroec a|chladu a|dar+
uot y vlỽydẏn. Priaf vrenhin ac ecuba y|wreic a|phol+
ixena y verch a gỽyr troea y|rei ereiỻ a|deuthant hẏt
ar ved ector ac achil a|deuth yn|y erbyn. ac edrych
a|wnaeth ar bolixena a|e phryt hi a|e thegỽch a aeth y+
n|y vedỽl ef a|dechreu a|wnaeth y charu yn vaỽr.
ac odyna treulaỽ y vuched a|wnaeth ef yn|y ỻesged
ac yn seguryt o garyat y vorỽyn a|ỻidyaỽc y|kymerth
ef arnaỽ dỽyn rac agamemnon yr amherodraeth
a gossot palamides yn benaf arnei ac ỽrth hyny me+
gys y kymheỻei garyat y vorỽyn gorchymẏn a|wna+
eth y|fydlonhaf was ef frigius y|hỽnỽ vynet at ecuba
gỽreic briaf y erchi poỻixena y|merch|i yn wreic y achil. ac
| « p 15r | p 16r » |