NLW MS. 3035 (Mostyn 116) – page 30r
Brut y Brenhinoedd
30r
hon ry vuassei y|saỽl vil o vlynyded. Ac amseroed a+
dan vrenhined goroec yg|keithiwet. pỽy a|geissei ỻa+
uuryaỽ ygyt ac ỽyntỽy y geissaỽ rydit o|r ryỽ ge+
ithiwet honno. a|chan gaỻỽys y|gỽas jeuanc hỽn
hẏnnẏ. Mineu a|rodaf vy merch idaỽ ef yn ỻawen
Ac eur ac aryant a ỻogeu a|phob kyfryỽ beth o|r a
vo reit y hynt ỽrthaỽ ac o|byd gỽeỻ genỽch bres+
sỽylaỽ y·gyt a gỽyr goroec. mi a|rodaf y·ỽch trayan
vyg|kyuoeth yn ryd drỽy hedỽch y gyfanhedu. Ac
ony mynỽch namyn mynet ymdeith mal y bo
hyfrydach genỽch. Mi a|dygyaf ygyt a chỽi megys
gỽystyl yny vo paraỽt pop peth o|r a|edewit yỽch
A|gỽedy daruot kadarnhau yr amot y·veỻy y·ryg+
tunt yd anuonet y bob porthua o|r a oed yg|kylch
teruyneu goroec y gynullaỽ eu llogeu A gỽedy
dỽyn y|ỻogeu oỻ y vn ỻe eu llenwi a|wnaethpỽyt
o|pop peth o|r a vei reit ỽrth hynt A rodi y vorỽyn
a|wnaethpỽyt y vrutus. Ac y baỽb ar neiỻtu y|rodet
yn herwyd y voned a|e deilygdaỽt eur ac aryant
a|thlysseu a mein maỽrwerthaỽc yn amyl. A gỽedẏ
daruot hẏnnẏ yd eỻygỽyt y brenhin o|e garchar ac
yd|aeth gỽyr tro yn eu ỻogeu yn ryd o geithiwet
gỽyr goroec. ~ ~ ~
A c yna y gossodet y vorỽyn yr hon a elwit ignogen
gỽreic vrutus ẏn|y kỽr ol y|r ỻog. ac igwan a chỽyn+
uan a gymerth yndi am adaỽ y ryeni a|e gỽlat
Ac ny|throssei y|ỻygeit y ar y|gỽlat yny dygỽydỽys
y|weilgi ar y|traeth. ac yn hyny o yspeit yd|oed vrutus
yn|y|didanu Ac yn dywedut ỽrthi yn hegar Ac ar yr
hẏnẏ ny thawei yny dygỽydỽys kysgu arnei Ac ẏ+
| « p 29v | p 30v » |