NLW MS. 3035 (Mostyn 116) – page 50r
Brut y Brenhinoedd
50r
A c ym|pen y|dỽy vlyned eilweith paratoi ỻyges a oruc
vlkessar y geissaỽ dial ar gaswaỻaỽn y|sarhaet a wna+
thoed idaỽ A|phan gigleu gaswaỻaỽn hynẏ kadarnhau
y gestyỻ a|oruc a gỽneuthur ereiỻ o newyd A gossot keit+
weit kadarn ym|pop porthua yg|kylch ynys brydein. A|gỽ+
neuthur cudyedic sycheu o heyrn ar hyt tanaỽl temys
a gossot y|rei hynny ỽrth gadỽyneu ỽrth dyỻu eu ỻogeu
y adanunt o delynt yno. Ac odyna y doeth kaswaỻaỽn a
hoỻ gedernit yr ynys|gantaỽ y gadỽ yr aruordir racdaỽ ~
A gỽedy daruot y vlkessar kaffel pop peth yn baraỽt.
kychwẏn ar y|mor gan luosogrỽyd gantaỽ parth ac
ynys brydein. A|phan yttoedynt yn dyuot ar hyt
temys y briỽỽys y ỻogeu gan y ssycheu kudyedic yn|y
dỽfỽr ac y|periglỽys ỻawer yn deissyfyt A gỽedy gỽelet
hẏnẏ onadunt keissaỽ y tir a|orugant yn angerdaỽl. A|phan
welas kaswaỻaỽn hẏnnẏ gỽedy rodi arỽyd o|e gytuarch+
ogẏon eu kyrchu yn dianot A gỽrthỽynebu yn ỽraỽl
a oruc gỽyr rufein. kyt ry|diodefynt diruaỽr perẏgẏl
ar y dỽfyr a dodi eu gỽeỽwyr a|e gleỽder yn ỻe mur y·ry+
dunt. Ac yna y gỽnaethpỽyt aeruaeu o|bop parth. Ac eis+
soes kan oed mỽyaf nifer y brytanyeit y kaỽssant y vudu+
golyaeth gỽedy gỽahanu gỽyr rufein. A|gỽedy gỽelet o vl+
kessar y dygỽydaỽ yn|y ran vỽyaf a gỽaethaf o|r ymlad
ymchoelut y|ỽ ỻogeu a oruc a chymrẏt y mor yn ỻe gofunet
idaỽ. A|chan|wynt tymhestlaỽl hỽylaỽ yny doethant y dra+
eth moryan y|r tir Ac odyna yd aeth hyt yg|kasteỻ odnea
yr hỽn a|wnathoed kyn no|e vynet y ynys brydein rac ofyn
ymchoelut y|freinc arnaỽ o delhei ar fo o ynys brydein
val yd ymchoelysynt gynt. Ac ỽrth hẏnẏ yr wnathoed
ynteu y kasteỻ hỽnỽ ar lan y|mor mal na eỻit y ludyas
y|r tir pan delei y ar y|mor ~ ~ ~ ~ ~ ~ ~ ~ ~ ~
| « p 49v | p 50v » |