NLW MS. 3035 (Mostyn 116) – page 55r
Brut y Brenhinoedd
55r
ineb eu gỽeresgyn noc ymrodi yn petrus y ymlad ac
ỽynt. Sef yd anuones gan y|genadeu rodi y verch y|wei+
ryd yn wreic idaỽ gan gynhal y vrenhinyaeth y|ynys pry+
dein dan goron rufein Ac o gyt·gygor gỽyrda ynys
brydein a|e doethon y kahat gỽneuthur y tagnefed. A
chymrẏt merch ẏr amheraỽdyr yny* wreicta y|r brenhin
A|dywedut hefyt a|wnaethant ỽrth ẏ brenhin nat oed
waratwyd idaỽ darestỽg y amheraỽdyr rufein. Pan
vei yr hoỻ vyt yn gỽedu idaỽ. Ac veỻy drỽy y ryỽ ym+
adrodyon hynny vfydhau a oruc gỽeiryd y eu kyghor
a|darestỽg y amheraỽdyr rufein. Ac yn diannot yd|an+
uones gloyỽ yn ol y verch ỽrth y|rodi y|weiryd. A|thrỽẏ
porth gỽeiryd a|e ganhorthỽy gỽedy hynnẏ y gỽeres+
gynỽẏs gloyỽ yr ynyssed ereiỻ yn|y gylch. ~ ~ ~
A gỽedy mynet y gayaf hỽnỽ heibaỽ a dyuot gỽan+
hỽyn y doeth y|kenadeu o rufein a|merch yr amheraỽ+
dyr ganthunt. Ac y|ducsant at y|that. Sef oed y henỽ
gỽenwissa. Ac enryfedaỽt oed y thegỽch o|pryt a gosged
A gỽedy y rodi y|weirẏd mỽẏ y|karei ef hi no|r hoỻ vyt. Ac
ỽrth hyny y|mynỽys ef enrydedu y|ỻe kyntaf y kysgỽys
genti o dra·gywydaỽl gofedigaeth Ac erchi a|wnaeth gỽei+
ryd y|r amheradẏr a·deilat dinas yn|y ỻe hỽnnỽ y|gadỽ
cof ry|wneuthur neithoreu kymeint a|r rei hẏny drỽy
yr oessoed Ac vfydhau a oruc yr amheraỽdyr ỽrth hẏnẏ
Ac adeilat dinas a|chaer a galỽ hỽnnỽ yn dragywyda+
ỽl o|e enỽ ef kaer loyỽ. Ac yn gyffinyd rỽg|kymry a
ỻoegẏr y|mae y dinas hỽnnỽ ar lan hafren. Ac y|gelwit
kaer loyỽ yr hyny hyt hediỽ A gloechestyr yn saesnec
Ac ereiỻ a dyweit mae achaỽs mab yr amheraỽdyr
a anet yno a elwit gloyỽ gỽlat lydan Ac eissoes o|r ach+
aỽs kyntaf a|dywespỽyt yd adeilỽys y|dinas.
| « p 54v | p 55v » |