BL Cotton Cleopatra MS. B V part i – page 87v
Brut y Brenhinoedd
87v
Ac yna yd aeth y kenadeu y tu a ruvein. Pan gigleu
lles amheraudyr ruvein geirieu arthur amdanaw;
yn diannot y|daeth ynteu y gymryt y gynghor ef a
sened ruvein. Sef y cavas yn|y gynghor anvon kena+
deu ar brenhined y dwyrein; y erchi ydunt nerth
y ystwng arthur. Sef rivedi a gauas. Epistrophus
brenhin groec. Anustensar brenhin yr affric. an* Af+
facinia brenhin yr yspaen. ac Jrtacus brenhin Ciria.
a Boctus brenhin med. a Sertorius brenhin twrrea.
Pandrassus brenhin yr eifft. Mitipan brenhin babi+
lon. Politetes brenhin bithinia. Teuter duc frigia.
Evander brenhin suria. Eschilon brehin boetia. Jpoli+
tus brenhin creta. Ac y·gyt a hynny tywyssogeon
a ieirll a barwnieit; a llawer o wyrda a oed darys+
twnghedic y sened ruvein a vydei ry vlin ev hen+
wi. Ac o sened ruvein yd oed Lles amheraudyr. a
meuric. a lepidus. a Gaius. a Metellus. a Chocta.
a Chwyntus. a Miluius. Catulus. Cuintus. Cauricius.
Sef oed hynny o rivedi ygyt deugeint wyr a chant
a phedwar cant mil o vilioed. A gwedy daruot
ydunt llvnyethu pob peth erbyn aust; wynt a|do+
ethant y tu ac ynys brydeyn. A gwedy gwybot o ar+
thur hynny; ymgyweiriaw a oruc ynteu a|y niver
y·gyt ac ef. A gorchymyn y vedrawt y nei vab y
chwaer. ac y wenhwyuar y wreic briaut llywodraeth
ynys brydein. yny delei ef drachevyn; yw gadw yn
didwyl* gywir fydlawn. Ac yna yd aeth arthur
y tu ar mor; a phan gavas gwynt gyntaf. ef
a gymyrth vordwy. Ac ef a welei breudwyt oed
| « p 87r | p 88r » |