NLW MS. 3035 (Mostyn 116) – page 139r
Brut y Brenhinoedd
139r
hỽnỽ y|r neiỻ o·nadunt a|e ỻad a|e dehol o|r ẏnys hon Ac
ỽrth hyny katwaỻaỽn a|ganhadaỽd y|peanda ryfelu ac
oswi aelwyn Ac odyna peanda a|gynuỻỽys ỻu maỽr ac
a|aeth drỽy humẏr ar tor oswi a dechreu anreithaỽ y gỽ+
ladoed a ryfelu arnaỽ yn|drut Ac o|r diwed rac aghen
oswi aelwyn a gynnigỽys brenhinolẏon rodyon o eur
ac aryant mỽy noc y geỻit y gredu y peanda yr peidaỽ
a ryfelu ac ymchoelut atref Ac gỽedy na mynei pe+
anda dim y|gan oswi. ynteu a syỻaỽd ar ganhorthỽẏ
duỽ A chyt bei lei eiryf y lu noc ỻu peanda. ef a|rodes
brỽydẏr idaỽ ger ỻaỽ afon|winued A gỽedy ỻad peanda
a dec tywyssaỽc ar|hugeint ẏgẏt ac ef Oswi aelwyn a
gafas y vudugolyaeth. A gỽedy ỻad penda katwaỻaỽn
a|rodes y vlfrit y gyfoeth. a|hỽnỽ a gymerth ebba ac etberth
y|ryfelu ar oswi aelwyn Ac o arch katwaỻaỽn. ỽynt a gym+
odassant A gỽedy eilenwi ỽyth mlyned deugein y bonhed+
ickaf a|r kyfoethocca gatwaỻaỽn brenhin y brytanyeit
yn treuledic o|heneint pytheỽnos gỽedy kalan gayaf
yd aeth o|r byt hỽn A|e gorff a irỽyt ac ireideu gỽerth+
uaỽr ac y dodet y|myỽn delỽ o|efyd a|wnathoedic* ar y
vessur a|e veint e|hun A|r delỽ hono a dodet ar delỽ march
o|efyd yn aruaỽc enryfed y thegỽch a hono a ossodet ar
porth y|parth a|r goỻewin yn ỻundein yn arỽyd y|r racdy+
wededigyon vudugolyaetheu vchot. yr aruthred y|r saes+
on. Ac y·danaỽ yd adeilỽyt eglỽys yn yr hon y kenir of+
fereneu rac y eneit ef ac eneiteu cristynogyon y byt oỻ
A hỽnỽ vu y tewysaỽc efydaỽl ar darogan myrdin.
A gỽedy marỽ katwaỻaỽn. katwaladẏr vendigeit
y vab a|gymerth ỻywodraeth y teyrnas yr hỽnn
a|elwis beda clytwaỻt ar y dechreu gỽraỽl a|thag+
| « p 138bv | p 139v » |