Breudwd Welsh Prose 1300-1425
Cymraeg

NLW MS. 24029 (Boston 5) – page 177

Llyfr Blegywryd

177

o|lunẏeith a|wnel ẏg|gỽẏd kẏhoed; holet
trỽẏ wẏbẏdẏeit. TRi dẏn a|dẏlẏant
sarhaet. ac nẏ|dẏlẏant alanas ẏỽ;
vn ẏỽ. o|deruẏd tẏbẏaỽ ar dẏn llad ẏ ll  ̷+
all. ac na|s gỽatto kẏt boet gỽirion.
Ac am hẏnnẏ ẏ sarhair; ef a|dẏlẏ tal  ̷
ẏ sarhaet. a phei lledit ny chaffei dim.
Eil ẏỽ; o deruẏd ẏ|dẏn talu cỽbẏl o alan  ̷+
as. namẏn vn geinnaỽc. Ac am hẏn+
nẏ ẏ sarhau. ef a|dẏlẏ tal ẏ|sarhaet.
a phei lledit nẏ chaffei dim. Trẏdẏd
ẏỽ; caeth. nẏt oes alanas idaỽ. namẏn
talu ẏ werth o|e arglỽẏd mal gỽerth
llỽdẏn. TRi dẏn a|dẏlẏant alanas.
ac nẏ dẏlẏant sarhaet. Yn·vẏt. A|dẏn
a ladher a gỽenỽẏn. a|dẏn a|ladher a
saeth trỽẏ arall. TRi dẏn nẏ dẏlẏ+
ant na sarhaet na galanas. kẏt
llather. vn ẏỽ; dẏn a darffo ẏ|aniue+
il ẏ lad. A dẏn a gaffer yn rodẏaỽ
ẏstauell ẏ brenhin hẏt ẏ nos. heb
na|than. na goleuat ẏnn|ẏ laỽ. A|dẏn
a lather a phrenn ẏnn|ẏ vỽrỽ gan
ẏ rẏbudẏaỽ. Teir merchet a|dẏlẏ+
ant talu amobreu. ac nẏ dẏlẏant