BL Cotton Cleopatra MS. A XIV – page 51v
Llyfr Cyfnerth
51v
MAer bisweil a geiff y sỽyf ar blonec
or llys. Ef bieu y crỽyn y guarthec
a| uo teir nos ar warthec y maerty. Y maer
bisweil bieu gobyr merchet guyr y uaer+
tref. kyt sarhaont gỽassanaethwyr y llys
y maer bisweil ỽrth dỽyn bỽyt neu lyn or
gegin neu or ystauell parth ar neuad ar eu
ford nys diwygant idaỽ. Pan talher y sar ̷+
haet idaỽ whe bu a whe ugeint aryant a
telir. Yn| y alanas y telir whe bu a whe uge ̷+
in mu gan tri drychauel.
Dylyet y penkerd yỽ eisted ar gled yr et ̷+
lig. y tir a geiff yn ryd. Ef bieu canu
yn gyntaf yn| y neuad. Kyuarỽs neithaỽr
a| geiff nyt amgen no phedeir ar| hugeint
aryant y| gan pop morỽyn pan ỽrhao. ny
cheiff dim o neithaỽr gureic a ry| gaffo gynt
da ar y neithaỽr pan uu uorỽyn. Sef yỽ y
penkerd bard pan enillo kadeir. Ny eill
neb bard erchi dim heb ganhyat y penkerd
hyt y bo y penkeirdaeth ef. onyt bard gor+
| « p 51r | p 52r » |