BL Cotton Titus MS. D IX – page 38r
Llyfr Blegywryd
38r
ỽedi y|r gỽr. TRi pheth ny ellir y|dỽynn
rac gỽreic kyt gỽahanner a|hi am|y cham.
y|chowyll. a|e|hargyureu. a|e hỽynebỽer+
th. os ry|gauauas kynn o|hynny. o|gym+
ryt o|e gỽr wreic arall yn|y herbyn. TRi
defnyd haỽl yssyd; golỽc. a|geir. a|gỽeith+
ret. TRi golỽc a|dygir yg|kyureith; go+
lỽc tyst o|e tystolyaeth. a|golỽc mana ̷+
gỽr o|e vanac. a golỽc llygatrut kylus
am lad. neu losc. neu letrat. TRi geir
kylus yssyd; geir y bo gỽely tauot ymd+
anaỽ. a gỽallaỽgeir yn llys. a|thauotr+
udyaeth. am lad. neu losc. neu loetrat.
TRi ryỽ wallaỽgeir yssyd; geir gỽall yn
holi o|rỽy. neu o|eisseu. a|geir gỽall yn am+
diffynn o|rỽy. neu o|eisseu. a geir gỽall yn
gỽadu. O|r kynntaf y|kyll haỽlỽr y|haỽl.
o|r a|berthyno vrth y|geir. o|r|dygir tyston
yn|y erbyn. ac ny chyll camlỽrỽ. canyt
oes gamgỽyn kylus yg|kyureith nam ̷+
yn tri. O|r eil; neu o|r trydyd. y|kyll am+
diffynnỽr gamlỽrỽ. o|diuỽyn yr haỽl o|r
a|berthyno ỽrth y|geir y tystỽyt o|e wall.
TRi theruyn haỽl yssyd; gỽadu. neu bro+
vi. neu lyssu tyston. TRi pheth ny|chyg+
ein yg|kyureith. praỽf ar|weithret. na ̷+
| « p 37v | p 38v » |