Cardiff MS. 1.363 (Hafod 2) – page 65r
Brut y Brenhinoedd
65r
tyotes. ac odyna y deỽth hyt yn rỽueyn ac|yno
y presswllyỽs ac|y kynhelys escobaỽt. ac yd anỽo+
nes ynteỽ marc ewangelystỽr hyt yr eyfft y
y* pregethỽ yr eỽeghyl a yscryỽennassey.
AC gwedy mynet Gloew kessar o|r ynys a ch+
ymryt o Gweyryd synhwyr a syberwyt a
molyant dechreỽ adeylat y dynassoed ar kestyll
a llywyaỽ y pobyl ar kyỽoeth trwy yaỽnder a
gwyryoned hyt pan oed y oỽyn a|e aryneyc ar
y teyrnassoed a oedynt ym pell ac yn a·gos ydav
Ac gwedy hynny kymryt syberwyt yndaw
a orvc a thremygv gwyr rỽueyn ac attael
eỽ teyrnget racdvnt a hep ỽynnỽ daly a da+
nadỽnt a ỽey hwy no hynny. Ac gwedy klyw+
et o Gloew kessar y chwedyl hvnnỽ ynteỽ a en+
ỽynnỽs ỽaspasyan y kymhell Gweyryd ar ta+
gnheỽed a gwyr rỽueyn ac y talỽ eỽ gnotae+
dyc teyrnget ỽdỽnt. Ac gwedy y dyỽot hyt
ym porth rỽtỽpy ef a devth Gweyryd a holl
kedernyt ynys prydeyn vrth lỽdyas hỽn+
nỽ a|e lw yr tyr. kanys kymeynt oed o nyỽer
y gyt ac ef megys yd oed oỽyn ac aryneyc ar
| « p 64v | p 65v » |