Cardiff MS. 3.242 (Hafod 16) – page 9
Rhinweddau Croen Neidr
9
bot pryt Matusalen dec arnaỽ. ac yn|y ỻe rac pryd
ỽynt a ffoynt y|ỽrthaỽ mal kanaỽon rac ỻeỽ neỽ+
ynaỽc. Pedwyryd yỽ; o|r byd y anuodlon y|dyn a
mynnu pellau hỽnnỽ y ỽrthyt; bỽrỽ ychydic o|r
ỻudỽ yn|y ty y bo y bressỽyluot yndaỽ. ac ef a|ffy
odyno ef a|e hoỻ niuer y|le arall. ac ueỻy o le pỽy
gilyd yny dileer yn|y mod hỽnnỽ. Pymhet yỽ.
pỽy bynnac a|alwer yng|kynghor ac a vynno y wa+
randaỽ yn vỽy noc arall; dyget ychydic o|r ỻudỽ
dan wadneu y draet; a gỽarandawedic a charedic
vyd pob peth o|r a|dywetto. a chadỽedic gan baỽb
gan voli y doethineb a|e ethrylithus. Chỽech yỽ;
o|r gỽybyd dyn dim myỽn keluydyt. a mynnu
ymorchestu; gossodet oet dyd dyd teruynedic y
hynny. a dodet ychydic o|r ỻudỽ dan y dauot tra
vo yn ymorchestu ac ny eiỻ neb y oruot a thauot
yr daet athro vo. a hynny a brefes* y meistyr Jon
o arabic lawer gỽeith yn|yr eifft ac yg|gwladoed e+
reiỻ ac a|e kafas yn brofadỽy ac yn wir. Seithuet
yỽ o|r byd dyn yn anwybodedic o|r|hynn a del rac
ỻaỽ pa wed y|del a pheth vo o|r mynn wiryoned; bỽ+
ryet ychydic o|r ỻudỽ ar|warthaf y benn. a|throet
gyfyrsi neu liein arall yngkylch y benn. ac aet y
gyscu. ac ef a wyl yn|y gỽsc wirioned o|r damchỽ+
ein hỽnnỽ o gỽbyl. wythuet yỽ; o|r mynn dyn wy+
bot kyfrinach gỽr neu wreic. bỽryet yn|y gỽsc
arnaỽ ychydic o|r|ỻudỽ. ac ef a|atteb idaỽ o|bob|peth
| « p 8 | p 10 » |