BL Harley MS. 958 – page 57r
Llyfr Blegywryd
57r
ar ẏ llaeth traẏan ẏ werth uẏd neu werth
ẏ torllỽẏth. Y neb a wertho kath bit drosti
na bo kathderic ar pop ỻoer ac nat ẏsso ẏ|cha+
nnawon a bot idi glusteu a llygeit a danhed
ac ewined a llad llygot yn da
G wẏd dỽẏ geinnawc kyfreith nyth
gwyd dỽẏ geinnawc kyfreith kyw
dan adein ẏ ỽam; keinnawc cotta a tal Pann
el y wrthi keinhaỽc kẏfreith awst dwy gein+
nawc kẏfreith a tal. Keilaỽc neu iar keinnawc
P ỽẏ bẏnnac a losco neuad ẏ brenhin [ a|tal
pob prenn a gynnhalẏo penn y ty ugeint a
tal y r brenhin dros benn y ty petwar ugeint
dros bop gody vgeint Gwerth gayaftẏ. o
bop fforch a gẏnhalẏo y nenbrenn ugeint ẏỽ
Dros y nenbrenn deugeint y colofneu. mein+
keu ystyffyleu amhinẏggeu Trothwyeu
gordrysseu Tupyst. doreu; pedeir keinhaỽc
kyureith a tal pob vn o hẏnnẏ Poỻẏon a gw+
yal keinnawc kẏfreith. Dorglwyt dỽẏ gein+
awc kyureith Clwẏd arall keinnawc kẏf+
reith Dros y gayafty oll punt a telir drostaỽ.
a deudec mu y r brenhin. Beutẏ gwarthec;
dec ar hugeint aryant. Dros gynhaẏafdẏ;
dec swllt Dros hafdẏ deugeint O|r noethir
gayafty trayann y werth a telir drostaw
| « p 56v | p 57v » |