NLW MS. Llanstephan 4 – page 18v
Buchedd Dewi
18v
rỽng y dor a|r paret. Dos di heb y sant
odieithyr yr eglỽys. ac arch y|r plỽyf dy+
uot y myỽn. a|phob vn a|doeth y|myỽn
y eisted ual y buassei. ac yna pregethu
a|oruc y sant yn eglur ac yn uchel. Yna
y govynnaỽd y plỽyf idaỽ paham na
eỻeist di bregethu ynni gynneu a nin+
neu yn ỻawen yn|damunaỽ dy waran+
daỽ di. Gelỽch heb y sant y ỻeian y
myỽn a yrreis i gynneu o|r eglỽys.
Heb·y nonn ỻyma vyui. Heb·y gildas
yna. Y mab yssyd yg|kroth y ỻeian
honn yssyd vỽy y vedyant a|e rat a|e
urdas no myui. kanys idaỽ ef e|hun
y rodes duỽ breint a|phennaduryaeth
hoỻ seint kymry yn|dragywydaỽl
kynn dyd braỽt a|gỽedy. ac am hynny
heb ef nyt oes ford ymi y drigyaỽ yma
hỽy o achaỽs mab y ỻeian racko yr
hỽnn y rodes duỽ idaỽ pennaduryaeth
ar baỽp o|r ynys honn. A reit yỽ ymi
heb ef vynet y ynys araỻ a gadaỽ y|r
mab hỽnn yr ynys honn. Gỽyrth araỻ
a|wnaeth dewi yn|yr aỽr y ganet ef. ef
a|doeth taraneu a|meỻt. a charrec a|oed
gyferbyn a phenn nonn a hoỻtes yny
| « p 18r | p 19r » |