NLW MS. Llanstephan 4 – page 30r
Buchedd Beuno
30r
Ys rodo duỽ ymi ac ys|gỽnel yrof y gỽr
yd ỽyf|i yn gỽassanaethu idaỽ na medo
aỽch etiued chỽi byth efo. a|ch distriỽ
chỽitheu o|r deyrnas honn rac ỻaỽ.
ac yno ual yd erchis beuno yn|y wedi
y kafas. Odyna y gedewis beuno y ỻe
hỽnnỽ ac y kerdaỽd hyt yng|glann dyfyr+
dỽy auon y geissyaỽ ỻe y wediaỽ duỽ. ac
ny|s kafas yny doeth hyt att temic vab
eliut. A|r temic hỽnnỽ a rodes y veuno
yn dragywydaỽl ac yn diosgryn tref.
ac yno yd adeilaỽd beuno eglỽys ac y
kyssegraỽd y duỽ. Temic kynn penn
haeach o amser a edewis y ỻe diffeith
hỽnnỽ y veuno. A dydgỽeith yd aeth
temic a|e wreic y|r eglỽys y warandaỽ of+
feren. a phregeth y gan veuno. a gadaỽ
gartref y verch yn|gỽarchadaỽ. a morỽ+
yn deckaf yn|y byt oed honno. ac ny
rodassit hi y wr yna etto. ac ual yd|oed
hi e|hun yn gỽarchadỽ. nachaf y gỽe+
lei y brenhin a oed ar y ỻe hỽnnỽ yn
dyuot y myỽn attei. a chradaỽc oed
y enỽ. Sef a|wnaeth hitheu kyuodi
yn|y erbyn a|bot yn ỻawen ỽrthaỽ. Sef
a|oruc y brenhin gouyn idi pa|le yd athoed
| « p 29v | p 30v » |