NLW MS. 3035 (Mostyn 116) – page 14r
Ystoria Dared
14r
y a·dolỽyn kygreir dec niwarnaỽt idaỽ val y|geỻynt
gladu y gỽyr a|ladyssit vdunt. a|phriaf gỽedy kymrẏt
kygor y|wyrda a|rodes yr oet a gỽedy dyuot yr oet
ar amser. andromacca gỽreic ector a|welas drỽy
y|hun na dylyei ector vynet y|r ymlad y dyd hỽnnỽ
a|phan datkanỽys y breidỽẏt idaỽ ef gỽreigaỽl vu
gantaỽ y geireu hynẏ. ac yna andromacca yn drist
a anuones at briaf y beri idaỽ wahard ector nat
elei y|dyd hỽnỽ y|r vrỽydyr. a|phan gigleu briaf hynẏ
yd anuones alexandyr ac elenus a|throilus a|mem+
non y|r vrỽydyr. ac yn hẏnẏ y dechreuis gỽyr goroec
dywedut yr dyuot dyd y vrỽydyr. ac y dylyit kyn+
nal amot ac ỽy a|thraethu ỻawer o|eireu gỽaratwy+
dus am wyr troea. ector ynteu val y|kigleu hynny
a gablỽys andromatka yn vaỽr am y geireu ac erchi
arueu a|wnaeth ac ny aỻỽyt y attal yn vn wed ac
yna andromacka o wreigaỽl gỽynuan a|wisgỽys
y·gyt wyr y casteỻ ac a|ryedhaaỽd at briaf vrenhin
ac a venegis idaỽ y breidỽyt ac ar vynet ector ar
frỽst maỽr arnaỽ parth a|r vrỽydyr a|chrymu ar|tal
y deu lin y troet y|brenhin. ac ynteu a|erchis y|vab a
oed yn sefyỻ gyt a hi galỽ ector dra|e|gefyn ac a orch+
ymynỽys y priaf vynet y|r vrỽydyr. ac yna pan we+
las agamemnon ac achil a|diomedes ac aiax nat
yttoed ector yn yr ymlad gỽychraf yr ymladassant
ac y|ỻadassant ỻawer o|dywyssogyon troea. ac yna
pan gigleu ector y kynỽryf a|r teruysc a oed ar wyr
troea yn|y vrỽydyr kyrchu y vrỽydyr a|wnaeth ac ar
hynt ef a|ladaỽd idomedius. ac a vrathỽys ipicus
a|e wayỽ ac a|e brathaỽd yn|y vordỽyt. a|phan welas
| « p 13v | p 14v » |