Breudwd Welsh Prose 1300-1425
Cymraeg

NLW MS. 3035 (Mostyn 116) – page 185r

Brut y Tywysogion

185r

yr haelaf o hoỻ dywyssogẏon kẏmrẏ Y|vlỽydẏn hono hefẏt
y bu varỽ gỽiaỽn escob bangor gỽr maỽr y grefyd a|e an+
ryded a|e deilygdaỽt ac y bu diffyc ar yr heul. Y|vlỽẏdẏn
hono y bu varỽ archescob keint. ac yna y|ỻas einaỽn o|r
porth y gan y vraỽt ac y goresgynaỽd yr arglỽyd rys gasteỻ
niuer ac y|bu varỽ ywein ap rẏs yn ystrat flur. Y vlỽẏdẏn
rac·ỽyneb y diegis Madaỽc ap rys o garchar arglỽyd
brecheinaỽc ac y|goresgynaỽd yr arglỽyd gasteỻ ỻan+
yhadein ac y bu varỽ gruffud ap cadỽgon. Y vlỽẏdẏn
racỽyneb y delis neb vn Jarỻ a rikert vrenhin ỻoegẏr ac
ef yn dyuot o garỽyssalem ac y dodet yg|karchar yr am+
heraỽdyr a|thros y eỻygdaỽt ef y bu diruaỽr dreth dros
ỽyneb hoỻ loegẏr. yn gymeint ac nat oed ar helỽ eglỽẏs+
wyr na chrefydwyr nac eur nac aryant hyt yn oet y|careg+
leu a dotrefyn yr eglỽysseu ar ny orffei y dodi oỻ y medyant
sỽydogyon y|brenhin a|r teyrnas ỽrth y|rodi drostaỽ. Y vlỽy+
dẏn hono y darestygaỽd rodri ap ywein ynys von drỽy nerth
gỽrthrych vrenhin manaỽ a|chyn pen y vlỽydẏn y gỽrthla+
dỽyt y gan veibon kynan ap ywein. Y vlỽẏdẏn hono nos
nadolic y doeth teulu maelgỽn ap rys a blifieu gantunt
y|dorri casteỻ ystrat meuruc ac yd eniỻassant y casteỻ Y vlỽy+
dyn hono y kauas hỽel seis ap yr arglỽyd rys gasteỻ gỽis
drỽy vrat ac y deỻis phylip ap gỽis keitwat y|casteỻ a|e|wreic
a|e deu vab. a|gỽedy gỽelet o|r dywededic hỽeỻ na aỻei ef
gadỽ y|kestyỻ oỻ heb vỽrỽ rei y|r ỻaỽr ef a ganhadaỽd y
teulu ac y deulu maelgỽn y vraỽt torri casteỻ ỻanyhadein
a|e distryỽ a|phan gigleu y flandrassyeit hẏnẏ ym·gynuỻaỽ
a|wnaethant yn dirybud yn erbyn y deu vroder a|e kyrchu