NLW MS. 3035 (Mostyn 116) – page 99v
Brut y Brenhinoedd
99v
Ac ỽrth hẏnnẏ y brenhin a en·rydedỽys yr ỽylua hono yn vren+
hinyaỽl y|megys y darparassei. Ac y ymrodes y lewenyd ygyt a|e
wyrda A|ỻewenẏd a|wnaei paỽb. kanys ỻawen oed y bren+
hin yn aruoỻ paỽb onadunt ỽy ac yno y dothoedynt y
saỽl vonhedigyon a dylyedogyon gyt ac eu gỽraged ac
eu merchet megys yd oedynt teilỽg o enrydet kymeint
a|hỽnnỽ. Ac yno y doeth Gỽrlois tywyssaỽc kernyỽ ac eigyr
y|wreic ygyt ac ef. A|phryt y wreic hono a|e thegỽch a|orchy+
uygei wraged ynys prydein oỻ. kany cheffit vn kyn decket|a|hi
A gỽedy gỽelet o|r brenhin. Eigyr ym|plith y gỽraged e+
reiỻ. syỻu a oruc ernei yn graff Ac ymlenwi o|e char+
yat yn gymeint ac nat oed dim gantaỽ neb na+
myn hi e|hunan a|e hoỻ vedỽl a|e hoỻ ynni yn|y chylch hi
y|treiglei ef Ac y hono e|hunan yd anuonit yr an·regyon
odidaỽc a|r gỽirodeu a|r annercheu serchaỽc heb orffowys
Ac yn vynych amneidaỽ arnei a|chỽerthin a geireu digrif
gỽaryus a|dywedei A|phan welas y gỽr hi hyny. ỻidyaỽ
a|oruc yn vỽy no meint a heb ganhat yn gyffroedic
adaỽ y|ỻys yn dianot Ac ny bu yn|y ỻys neb a aỻei y|wa+
haỽd. kanys ofyn oed gantaỽ coỻi yr hyn mỽyaf a|ga+
rei o|dim bydaỽl. Ac ỽrth hyny ỻityaỽ a blygu a|oruc y|bren+
hin ỽrthaỽ ac erchi idaỽ ymchoelut y|r ỻys y|wneuthur
jaỽn y|r brenhin o|r sarhaet a|wnathoed am adaỽ y|ỻys
yn aghyfreithaỽl yn herwyd y barnei gyfreith ỻys idaỽ
A gỽedy nat vfydhaei gỽrlois idaỽ ỽrth y orchymyn ỻityaỽ
yn vaỽr a oruc y brenhin. ac yn|y lit a|e gyffro tygu yd
anreithaỽei y gyfoeth yn hoỻaỽl ony delei y|wneuthur iaỽn
idaỽ. A heb vn gohir a racdywededic irỻoned hono yn par+
hau y·rydunt. kynuỻ ỻu a|oruc y brenhin a|mynet tu a
chernyỽ. a dechreu ỻosgi y dinassoed a|r kestyỻ a|r trefẏd
ac ny la
| « p 99r | p 100r » |