NLW MS. 3036 (Mostyn 117) – page 155
Brut y Brenhinoedd
155
yt ỽybot py vn gyntaf a ochely onad+
o|r lleill parth it y mae y saesson yn gor+
yn dy gyfoeth. Ac yn llauuryaỽ y geissaỽ dy
agheu. Ac o|r parth arall y mae y deu uroder emreis
wledic ac vthyr pen·dragon yn llafuryaỽ y|geissaỽ
dial agheu eu tat arnat. Ac ỽrth hynny keis le y
ffo os gelly. kanys auory y deuant y traeth tỽtne+
is y tir ynys prydein. ỽynt a gochant ỽynebeu
y saesson o|e guaet. A guedy y bo lladedic hengyst;
y|coronheir emreis wledic. Emreis a hedycha y|gỽ+
ladoed. Ac a atnewydha yr eglỽysseu. Ac o|r diwed
a guenỽyn y lledir. Ac yn|y ol ynteu y coronheir v+
thyr pen·dragon y vraỽt. Ac eissoes a guenỽyn y
byrheir y diwed ynteu. kymeint a hynny vyd brat
dy saesson ti. A rei hynny baed kernyỽ a|e llỽnc. Sef
oed hỽnnỽ arthur. A phan doeth y dyd tranoeth y
doeth emreis wledic ac vthyr pendragon a deg
mil o varchogyon aruaỽc gantunt yr tir.
AC yna pan glyỽspỽyt y|chwedyl hỽnnỽ yn
honheit; ymgynnullaỽ a|wnaeth y brytan+
yeit o pop lle o|r yd oedynt wascaredic. A dyuot
yn toruoed gan diruaỽr lewenyd o glybot dyuot
eu kiỽtaỽtwyr attadunt. A guedy dyuot paỽb
ygyt o|r yscolheigon ar lleygyon. kyssegru em+
reis a wnaethant yn vrenhin yn herwyd eu ky+
nefaỽt gỽrhau a guedu idaỽ. Ac mal yd oed paỽb
yn annoc mynet am pen y saesson. Sef a oruc
| « p 154 | p 156 » |