NLW MS. 3036 (Mostyn 117) – page 181
Brut y Brenhinoedd
181
reu llosci y dinassoed ar kestyll ar treuyd. Ac yr
hynny eissoes ny lauassỽys Gorlois ymerbyny+
eit ac ef. kanys llei oed y nifer noc vn y brenhin.
Ac ỽrth hynny sef y kauas yn| y gyghor kadarn+
hau y| gestyll. Ac yuelly arhos porth attaỽ o iwer+
don. A chan oed mỽy y ofal am y wreic noc ymda+
naỽ e| hun. Sef a wnaeth y gossot hi yg kastell tin+
tagol ar lan y traeth yn| y lle cadarnhaf yn| y gyfo+
eth. Ac ynteu e| hun a aeth y gasstell dimlot. rac
eu kaffel ell deu ygyt o dryc damwein. A phan gi+
gleu y brenhin hynny. Sef a| wnaeth ynteu my+
net parth ar kastell yd oed gorlois yn·daỽ. A guedy
y| gylchynu dechreu ymlad ac ef a|e warchae mal
na chaffei neb na dyuot o·honaỽ na mynet idaỽ.
a guedy mynet yspeit ỽythnos heibaỽ. coffau a
oruc vthyr pen·dragon karyat eigyr. A galỽ vlfin
o ryt garadaỽc y| getymdeith a|e gytuarchaỽc. A
menegi idaỽ y vedỽl yn| y wed hon. Dioer heb
ef maỽr yỽ ynof i karyat eigyr. Ac nyt diheu
genhyf na chollỽyf vy eneit ony chaffaf y wreic
ỽrth vyg kyghor. Ac ỽrth hynny dyro im gyg+
hor trỽy yr hỽn y| gallỽyf eilenwi vy ewyllis.
kanyt oes pedruster genhyf vy aballu o|e char+
yat ony|s caffaf. Ac y dywaỽt ulfin yna ỽrth y
brenhin. Arglỽyd heb ef pỽy a allei rodi kyghor
itti pryt na bo fford yn| y byt yd ymgaffer a hi.
kanys y kastell y mae hi yndaỽ yssyd ar pen karrec
| « p 180 | p 182 » |