NLW MS. Peniarth 11 – page 104r
Ystoriau Saint Greal
104r
o achaỽs dy dyuotyat ti. A|m|dwyn o|r|poen hỽnn a roi ym lew+
enyd nefaỽl. ỻawen vu gan y myneich o|r ty pan welsant. Ac yna
galaath a|gymerth corff simei. ac a|beris y|dwyn y|r eglỽys a|e
gladu yno yn enrydedus. a|gỽedy daruot hynny y myneych
a|doethant att galaath ac a|wnaethont lewenyd maỽr idaỽ.
ac a|ovynnassant idaỽ pa|vn oed ac o ba genedyl yr hanoed. ac
ynteu a|dywaỽt kỽbyl o|r wirioned udunt am a|ovynnassant.
Trannoeth gỽedy gwarandaỽ offeren ef a|gychwynnaỽd ym+
meith drỽy gennat y myneich. Ac ueỻy y bu|ef yn crỽydraỽ y+
nys prydein ac yn bwrỽ dryc·anturyeu y arnei pump mlyned
kynn y dyuot y lys brenhin peleur. Ac yng|kỽbyl o|r pump mly+
ned hynny ef a|vu baredur y·gyt ac ef. ac yma y mae y kyuarỽyd+
yt yn traethu na|bu galaath a|pharedur eiryoet yn|ỻe yr amlet
ac yr mein* vei o bobyl yn eu herbyn ny cheffynt ỽy y vudugoly+
aeth o anuod paỽp ~ ~ ~ ~ ~
D Jwarnaỽt yr|oed galaath a|pharedur yn marchogaeth drỽy
fforest vaỽr dec ynyal. nachaf yn kyuaruot ac ỽynt bỽrt
e|hunan yn marchogaeth. a|ỻawen vu bop vn onadunt ỽrth y gil+
yd. A|phaỽb onadunt a|ovynnaỽd y gilyd y gyfrangk. Ac yna bỽrt
a|dywaỽt na|buassei ef gystal pedeir|nos yr ys|pum mlyned myỽn
gỽely nac y myỽn casteỻ. namyn myỽn fforestyd diffeith yn|y|ỻe y
coỻassei ef lawer gỽeith y eneit pany bei vot gras duỽ a|e gan+
horthỽy yn|y gadỽ. Yna paredur a|ovynnaỽd idaỽ a|welsei yr|hyn+
ny hyt hediỽ dim y|ỽrth yr hynn yd|oedynt yn|y geissyaỽ. Na|we+
leis arglỽydi heb ynteu namyn mi a|debygaf nat ymwahan+
ỽn i* beỻach yr|vn y|ỽrth y gilyd yny gỽelom. Poet veỻy y bo heb+
y galaath.
| « p 103v | p 104v » |