NLW MS. Peniarth 11 – page 87r

heb hi kanys gỽdost di y byd y marchaỽc urdaỽl hỽnnỽ ac y ra+

gora ef o|vilỽryaeth. rac marchaỽc o|r a|uu eiryoet. nac o|r a vyd vyth

ef a|vydei enryded maỽr debygỽn j gỽneuthur idaỽ ynteu ryỽ aryf

a|uei ragorussach y vreint noc aryf arall o|r a vu eiryoet nac o|r

a|vo vyth. a selyf a dywaỽt na|wydyat ef ỻunyaethu yr aryf hỽn+

nỽ. Myui a|e dysgaf ytt heb hitheu. Yn|y demyl heb hi a|wnaetho+

st yr anryded y|r arglỽyd y mae cledyf dauyd dy dat ti. yn oreu ac yn|llym+

maf o|r|a|wnaethpỽyt eiryoet o gledyfeu y byt. kymer|di y cledyf

hỽnnỽ a|thynn y bỽmel a|e dỽrn y ỽrthaỽ. a thitheu kanys at+

waenost wyrtheu y mein a|r ỻysseu gỽna idaỽ dỽrn a phỽmel.

a|gwein. ual na|bu ac na|byd y gyfryỽ. a|gỽedy hynny minneu

a|rodaf idaỽ arwest ual y rangho bod ym y roi. Ac ueỻy y gỽna  ̷+

ethpỽyt megys y clywssaỽch yn|ỻe araỻ o|r blaen. Pan daruv gỽneu+

thur yr ysgraff a|e|dỽyn y|r mor. ef a|baraỽd gỽreic selyf gỽneuthur

gỽely tec yndi. a|roi kylchedeu tec arnaỽ. ac ar benn y gỽely

y rodes selyf y goron. ac ar|draet y gỽely y rodes y wreic y cledyf

Eissyoes y arwest ef a|wnathoedit o garth. o|r|achaỽs y|ỻidiaỽd

selyf. ac y|dywaỽt nat oed deilỽng bot y ryỽ arỽest a|honno. y

gledyf kystal a hỽnnỽ. a|hitheu yna a|dywaỽt na|chaffei ef amgen

arwest no honno yny|delei ryỽ vorỽyn a|e rodei idaỽ. ac ny wnn

i pa amser vyd hynny heb hi ~ ~ ~  

N y lauuryaỽd selyf mỽy yna yn erbyn y wreic. ac ef a|be+

ris gỽneuthur paỻ y|r ysgraff o|syndal. ac edrych ar y

gỽely a|orugant. Ac yna y wreic a|dywaỽt nat oed gỽbyl y gỽely.

a|chymryt deu saer y·gyt a|hi a|oruc. a|dyuot hyt y prenn y

ỻadyssit abel ydanaỽ. a hi a|erchis udunt torri peth ar|y prenn.