NLW MS. Peniarth 18 – page 35r
Brut y Tywysogion
35r
1
uerth goch ap maredud. a meibon madaỽc ap maredud.
2
a|holl poỽys ygyt ac ỽynt. A|deu uap uadaỽc ap id+
3
nerth a|e holl gyuoeth ygyt ac ỽynt. Ac ygyt ynn
4
gyuun diergrynedic y|doethant hyt yn edeirnaỽn
5
a|phebybyllu* a oruc yg|koruaen. a gỽedy trygyaỽ
6
ynn hir yn|y pebylleu yno hep arueidaỽ o un gyrchu
7
y|gilyd y|ymlad. llidyaỽ a|oruc y|brenhin yn|diruaỽr
8
A|chyffroi y|lu hyt yg|koet dyffryn keiriaỽc. a|phe+
9
ri torri y|coet a|e uurỽ yr llaỽr. Ac yno yd|ymerbyn+
10
nyaỽd ac ef ynn ỽraỽl ychydic o gymry etholedi+
11
gyon y|rei ny ỽydynt odef y|goruot ynn abssenn
12
y|tyỽyssogyon. a llaỽer o|rei kadarnnaf a|dygỽyd+
13
daỽd o|bop tu. Ac yna y|pebyllaỽd y|brenhin ar by+
14
dinoed blaen ygyt ac ef. ymynyded berỽyn. Ac
15
gỽedy trigyaỽ yno ychydic o dydyeu y kyỽarsag+
16
ỽyt ef o|diruaỽr dymestyl aỽyr. a|thra|llifeireint
17
glaỽogyd. A gỽedy pallu ymborth idaỽ yd|ymhoela+
18
ỽd y bebylleu a|e lu y uaestir gỽastatir lloegyr. Ac
19
yn gyulaỽn o|diruaỽr lit y peris dallu gỽystlon a
20
uuassei yg|karchar gantaỽ yr|ystalym o amser
21
kynn o|hynny. nyt amgen. deu uap yỽein gỽyned
22
a|chynỽric. A|maredud ap yr arglỽyd rys. a|rei
23
ereill. A gỽedy kymryt kyghor y|symudaỽd y lu
24
hyt yg|kaer lleon. Ac yno pebyllaỽ a|oruc laỽer o
25
dydyeu yny doeth llogeu o|dulun. Ac o|r|dinassoed
26
ereill yn iỽerdon ataỽ. A gỽedy nat oed digaỽn
| « p 34v | p 35v » |