NLW MS. Peniarth 32 (Y Llyfr Teg) – page 60
Llyfr Iorwerth
60
idaỽ yr|da. a|gỽadet ar y seithuet y uechni. a|r
gỽyr hynny|ny dylyant hanuot o genedyl y
kynnogyn; namyn o genedyl y brenhin. Kan+
ny deiryt kenedyl y kynnogyn y|r brenhin.
kyt gỽatto y brenhin y mach. yny dygỽydho
gỽat ar vab am vechni y dat. nyt neb o gene+
dyl y vam ef a|watta dim dros y dat ef. Teir
ouer·uechni yssyd. vn yỽ pan brynho dyn peth y
gan araỻ yr aryant; a chymryt mach ar y peth.
ac na chymerer mach ar yr aryant. a|bot yn edi ̷+
uar gan berchen yr aryant y gyfnewit. kanny
myn ef mỽynhau y mach yssyd idaỽ ar y peth
y kymerth. ac nat oes uach y|r ỻaỻ a gymheỻo
idaỽ y gyfnewit. ỽrth hynny y mae ouer y mach
o|r neiỻtu; kanny mynn y perchennaỽc ef. Yr|eil
yỽ. O|deruyd y|dyn rodi mach y araỻ ar beth an+
nilys yn rith dilys. a|dyuot perchennaỽc y da
a|e an·nilyssu. Jaỽn yỽ kaffel o|r perchennaỽc yr
eidaỽ. kyt roder mach ar y peth ny dylyir y rodi.
ac ny dylyir y gychwyn o|r ỻaỽ y mae yndi yny
del arỽystyl kystal ac ef y|gan yr|arwassaf. O|deruyd
y|r arwassaf dywedut na dyly talu namyn kym+
meint ac a|gafas ef yr y peth. Nyni a|dywedỽn
dylyu o·honaỽ ef talu gỽerth kyfreith. y peth py beth
bynnac vo. ac ỽrth na eiỻ y mach kynnal y
vechni yd aeth yn vach arnei y gelwir yn oueruach.
| « p 59 | p 61 » |