NLW MS. Peniarth 46 – page 151
Brut y Brenhinoedd
151
daỽ. a|dangos a|ỽnaeth y|baỽp y|rann. ac
yna y|gỽnaeth maxen eil bryttaen. ac y
rodes y kynan meirydaỽc. a|gỽedy dar+
uot idaỽ lluneithaỽ pob peth yno. y
kychỽynỽys parth ac|eithauoed
ffreinc a|rann arall o|r llu gantaỽ. ac y|da+
restygỽys o gỽbyl y|ford y kerdaỽd trỽy
urỽydreu ac ymlad. a gỽedy darestỽg
hynny idaỽ y|gossodes eisteduaeu y|teyr+
nas yn dinas a|elỽit treueris. ac yna
yd|aeth parth a ruuein y|ryuelu ar|y ̷ ̷
deu uroder oed amherodron yn rufein. Gra+
cian. a|ualaỽnt. a gỽedy ymlad a|r ne+
ill. a|e lad. y deholes y|llall o|ruuein. a|e
sened o gỽbyl. AC yn|yr hỽnnỽ yd|o ̷+
ed ỽyr freinc. a gỽasgỽyn. a|pheitaỽ.
yn|ryuelu ar kynan meirydaỽc urenhin.
llydaỽ trỽy uynych ymladeu. ac ynteu
yn ỽraỽl. a|bryttannyeit ygyt ac ef.
yn ymdiffryt gann talu aerua dros y
gilyd. ac eissoes gỽedy hedychu o|r diỽed
| « p 150 | p 152 » |